Omuniilonga gwaKaapanda ina monika natango

Omuniilonga gwaKaapanda ina monika natangoOmakonaakono aniwa onkene taga tsikile Ominista yokabinete nale Joel Kaapanda okwa popi kutya ina ningila omatilitho ofamili yomuniilonga mohambo ye ngoka a kana uule woomvula mbali monena. Oomvula mbali monena sho omuniilonga mohambo yaminista nale Kaapanda a kana tashi limbilike okuza mohambo yaKaapada, naKaapanda okwa popi lyotango kombinga yekano lyomulumentu ngoka. Moonkundathana ndhoka a ningwa naye koNamibian Sun mEtiyali, Kaapanda okwa koleke kutya omunamimvo 25 Fillipus Jurius okwa li e mu kutu miilonga mohambo ye tayi adhika momudhingoloko gwaNamatanga, ta gwedha po kutya omulumentu ngoka okwa li e mu dhengele ongodhi ta popi kutya aantu yamwe otaye mu piyaganeke. Kapaanda okwa popi kutya ina tsakanena naJurius ngoka a kana konima owala yomasiku gaali sho a tameke okulonga mohambo ye.

“Okamati hoka onde ka pewa komukwanezimo gwandje gumwe ngoka a li ha longelendje mohambo ndjoka na onde mu lundulula nokumufala kohambo yandje yimwe moTsintsabis. Ethimbo ndyoka onda li mOvenduka na onda ningi omalongekidho opo omuntu gumwe e ke mu tale nokumu fala kohambo. Okwa lala megumbo lyandje lyomomukunda nomesiku lyotango lyaAguste mo-2015 okwa falwa kohambo. Ongulohi yomasiku gaali gaAguste okwa dhengelendje ongodhi ta popi kutya opwali aantu taye mu piyaganeke taya popi kutya aniwa okwa dhipaga omukiintu, na okwe shi popi a ngungumana. Kandi shi ku kutya okwa hala okutya ngiini ngaaka ihe ongodhi oya gumo nasho nda kambadhala okumu dhengela ikando yontumba ongodhi inayi yamukulwa” Kaapanda ta ti.

Okwa popi kutya okwa ningi ekwatathano naashiinda ye pohambo, ihe inaya vula okumona omulumentu ngoka. Konima yomasiku gaali Kaapanda okwa lopota kopolisi kutya Jurius okwa kana.

Aakonaakoni yopolisi oyiitsu momasipa gomuntu popepi nohambo ndjoka ihe natango okwa tegelelwa ku ningwe omakonaakono ngele omasipa ngoka ogomuntu ngoka kwa lopotwa akana.

Yina yaJurius , Elizabeth Akooko, omvula ya piti okwa lombwele oshifokundaneki shoNamibian Sun kutya sho iikundaneki ya lopota kombinga yekano lyomonamati, Kaapanda okwe mu dhengele ongodhi te mu lombwele opo a hulithe po okutumbula edhina lye kaatoolinkundana.

Kaapanda okwa tindi omapopyo kutya okwa ningile ofamili omatilitho, ta popi kutya okwe ya pula owala opo ya hulithe po okupopya oshikumungu shoka niikundaneki.

Lwopokati mpoka, Phil ya Nangoloh gwoNamRights okwa fekele kutya ekano lyaJurius otashi vulika tali kwatakanithwa nuukongo mEtosha National Park.

Ya Nangoloh okwa popi kutya ehangano lyawo lyoNamRights olya konaakona oshikumungu shoka na olya mono kutya Jurius okwa kana pamukalo ngoka mwa kana aalumentu yatatu ya za mOpuwo mboka taya kwatakanithwa nuukongo mEtosha.

Ya Nangoloh okwa popi kutya inaya vula okumona ngele Ominista nale yOmauyelele otayi kwatakanithwa nuukongo momudhingoloko ngoka. Kaapanda okwa popi kutya ke na ontseyo kombinga yomakonaaakono ngoka ga ningwa kuYa Nangoloh.

“NamRights oku na omatompelo oku itaaala kutya okamati haka Jurius oka longithwa muukongo. Itatu ti kutya Kaapanda oye a ningi ngaaka, ihe otatu popi kutya ekano lye otali kwatakanithwa nuukongo ngaashi aalumentu yaaHimba yatatu mboka ya kana momukalo gwa faathana,” Ya Nangoloh ta ti.

Okwa popi kutya okwa kambadhala okukundathana shoka a mono po konima yomakonaakono ge nomukomeho nale gwOpolisi yaMusati, Shinedima Shindinge, ihe inashi pita.

Okwa pula woo omukomeho gwOpolisi yaNamibia,

Sebastian Ndeitunga opo omakonaakono moshikumungu hoka geendelelithwe.

“Onda kumwa kutya omolwashike Ndeitunga a mwena kombinga yoshikumungu shoka. Oshikumungu shika osha pumbwa okukonaaakonwa opo shi manithwe. Oye e na omayamukulo onga omukomeho gwopolisi.”

Ndeitunga okwa popi kutya itadhimbuluka oshipotha shaJurius molwaashoka ombelewa ye ohayi ungaunga niipotha oyindji, ihe ota dhimbuluka kombinga yaalumentu yaaHimba mboka inaya monika natango.

“Ka pule kombelewa yopolisi mOmusati, ondiinekela kutya Kaapanda okwa lopotwa oshiningwanima shoka popolisi yopopepi,” Ndeitunga a popi.

Okwa popi kutya ngele Ya Nangoloh okwa gandja oshizemo shomakonaakono ge kuShindinge nena Shindinge oku na okukala e shi kutya oshike sha holoka po, ongele pe na gumwe ta fundju.

Sho a ningilwa omapulo, Shindinge ngoka e li omukomeho gwopolisi yaHangwena monena okwa tindi okupopya sha.

ILENI NANDJATO