KFC e li mompumbwe yoondjuhwa

KFC e li mompumbwe yoondjuhwaOondjindikila odheetithwa ketukuko lyekunku lyiikwamawawa moSouth Afrika Nonando okwa ningwa omalunduluko omashona moondjindikila dheeto moshilongo lyoondjuhwa okuza moSouth Afrika, ehangano lyoKFC onkene lya taalela ompumbwe onene yonyama yoondjuhwa. Konima sho kwa tukuka omukithi gwekunku lyuudhila lyo (H5N8) moSouth Africa, Namibia okwa kaleke eeto moshilongo lyonyama yiikwamawawa oshowo iikwamawawa yi na omwenyo moshilongo okuza moSouth Afrika.

Konima yomwedhi gumwe gwa piti sho kwa tulwa miilonga oondjindikila ndhoka, uuministeli wuunamapya owa ningi omalunduluko nokupitika eeto moshilongo lyoondjuhwa dhimwe po kohi yekondololo lya kwata miiti. Nonando ongaaka KFC noostola dhilwe po oyeli natango mompumbwe.

KFC ndjoka tayi adhika mepandanda lyaTal Street, mOvenduka oya kala netseyitho lya tulwa pombaapila yi li posheelo kutya iilandithomwa yimwe po kayi mo mostola,netseyitho lya faathana otali adhika woo moostola dhimwe po. Namibia okwa lopotwa ha longitha ootona dhonyama yondjuhwa dha thika po-2 500 kehe omwedhi omanga oshilongo tashi vulu owala okulonga ootona 1 900. Namibia ngashiingeyi oha pitika eeto moshilongo lyonyama yondjuhwa oshowo iikwamawawa yilwe okuza poshishiindalongo South Afrika, kohi yekondololo lyuuministeli wuunamapya.

Iikwamawawa mbyoka tayi etwa moshilongo, okwa hololwa kutya nayi kale ya za kokule noshinano shookilometa 90 koombinga adhihe okuza moVaal Dam moka mwa dhidhilikwa kutya oofaalama odhindji dhoondjuhwa otadhi dhengwa komukithi ngoka.

Namibia haye owala ta mono iihuna omolwa oondjindikila ndhoka, ihe iilongo ngaashi Mozambique naye okwa tula po oondjindikila dhoondjuwa okuza koSouth Afrika.

Zimbabwe naDemocratic Republic of the Congo nayo otaya felelelwa etukuko lyomukithi ngoka noostola dhoKFC miilongo moka odha shunitha pevi elanditho lyiikulya oyindji mbyoka haya landitha mesiku.



ELLANIE SMIT