Omufekelwa moshipotha shiikengelela yobiliyona 3.5 a hulitha

Omufekelwa moshipotha shiikengelela yobiliyona 3.5 a hulitha Omukwashigwana gwaChina, Zhu Honggang, ngoka e li omufekelwa moshipotha shiikengelela neholeko lyoonzo dhiimaliwa yongushu yoobiliyona 3.5 okwa lopotwa a hulitha moChina.

Zhu ngoka a kala omunangeshefa a tseyika nawa moNamibia okwa li gumwe gwomwaamboka ya tulwa miipandeko omvula ya piti, moshipotha shoka sha kwatela mo omunangeshefa gwaChina a tseyika nawa Jack Huang.

Zhu okwa li pondje yodholongo sho a pewa omboloha yooN$500 000 sha landula etulo miipandeko lye mOndangwa muDesemba gwomvula ya piti.

Ompangu oya tseyithilwa kombinga yeso lye komukalelipo gwe gwopaveta Nambili Mhata.

Omukalelipo gwepangelo moshipotha shoka, Joseph Andreas okwa koleke kutya oya yakula onzapo yeso ihe okwa popi kutya ya pumbwa okutolokwa tango molwaashoka oyi li melaka lyoMandarin.

Metiyali aafekelwa owala yahamano yomaafekelwa yahetatu ya holola komeho yomupanguli Vanessa Stanley. Oonakuholoka mompangu, oLaurensius Julius, Huang oshowo aakwashigwana yaChina yane.

Okwa gandjwa elombwelo lyetulo miipandeko lyomukwashigwana gwaChina,

Huang Jinrong, ngoka a ndopa okuholoka mompangu, niimaliwa ye mbyoka a li a futu onga omboloha yomiliyona 1.5 otayi ningi po yepangelo.

Dirk Conradie, ngoka ta kalelepo Julius, okwa pula opo ompangu yi yululule koompango dhomboloha yomuyakulwa gwe opo a kale hiilopota kopolisi kehe omwedhi pehala lyokoshiwike ngaashi he shi ningi ngaashingeyi. Okwa pula woo opo omuyakulwa gwe a pitikwe okuza mo momudhingoloko gwaMbaye, namangestrata okwa ningi omalunduluko ngoka ngaashi sha indilwa. Aatamanekwa mboka yahetatu otaya patanekelwa oshipotha shiikengelela neholeko lyoonzo dhiimaliwa.

Mboka otaku popiwa ya kengelele uuministeli wemona pokati ko2010 sigo omasiku 19 gaDesemba 2016. Oshikondo shemona osha kanitha oobiliyona 3.5 okuza mekengelelo ndyoka. Oshipotha oshuundulilwa komasiku 22 gaJuni omvula twa taalela opo ku gandjwe ompito kaakonaakoni ya manithe omakonaakono gawo.



JACQUELINE LOUW