Oohapu dhetungo lyoshipangelo monooli dha tameke ishewe

Oohapu dhetungo lyoshipangelo monooli dha tameke isheweOpeni tapu tungwa oshipangelo shoka pokati kondoolopa yaNdangwa nOngwediva? Ope na ompito onene kutya oshipangelo oshinene monooli yoshilongo shoka tashi pangelwa okutungwa, otashi vulika shi kale inashi tungwa mondoolopa yaNdangwa. Okwa tukuka oohapu oompe kombinga yetungo lyoshipangelo oshinene monooli, sho ngoloneya gwoshitopolwa shaShana, Clemens Kashuupulwa a popi kutya okatokolitho ka ningwa kaaleli yomOshana opo oshipangelo shoka shi tungwe mOndangwa, kake na oonkondo dha sha.

Okwa hololwa kutya aniwa okatokolitho hoka ka ningwa pomutumba gwa kaliwa woo kominista yuundjolowele muMei, Bernhard Haufiku, kakeli paveta, sho kwa pulwa opo oshipangelo shoka shi tungwe mOndangwa nenge mOngwediva.

Uuministeli owa li wa tumu aanambelewa opo ya ka konaakone omahala ngoka tapu vulu okutungwa oshipangelo shoka, ihe Ongwediva oyo owala ya gandja ehala mpoka tapu vulu okutungwa oshipangelo shoka shoombete 1 000, omanga Ondangwa ya popi kutya oshitopolwa shevi shoka yali ya gandja opo pu tungwe oshipangelo shopashitopolwa natango oshiwanawa ngele opo tapu tungwa oshipangelo shoka oshinene.

Kashuupulwa okwa popi kutya okwa li kwa ningwa etokolo opo oondoolopa ndhoka mbali dhi gandje iitopolwa yevi mpoka tapu vulu okutungwa oshipangelo shoka ihe etokolo ndyoka olya ka piyaganekwa kOndangwa oshowo ookansela yamwe po.

Kashuupulwa okwa tsikile kutya natango okwa ka ningwa omutumba omutiyali, ihe natango ogwaadha okwena kwa thita kombinga yetokolo ndyoka.

“Ookansela natango oya pititha okatokolitho opo oshipangelo shoka shi tungwe mOndangwa, ihe okatokolitho hoka itaka ti sha. Ethimbo limwe ohatu ningi omatokolo inatu landula omilandu ngaashi dhi na okulandulwa.”

Omunashipundi gwOshana Regional Council, Gerson Hanu Kapenda, okwa popi kutya kape na omulandu guli miilonga ngoka tagu pitika omalelo giitopolwa nomalelo gondoolopa ga ninge omatokolo gopambelewa gopamwe.

“Otse elelo lyoshitopolwa naashoka osho sheetitha tu fale oshikumungu shoka momutumba gwelelo nokupititha okatokolitho, hoka keli omukanda gwopambelewa. Etokolo olya ningwa kwa taliwa kompumbwe yeyambulepo lyoshitopolwa na olya yambidhidhwa kookansela ayehe 11 moshitopolwa.”

Sho a ningilwa omapulo, Haufiku okwa tsu omuthindo kutya Ondangwa oya ya pondje etokolo ndyoka lya ningwa pethimbo lyomutumba ngoka gwa ningwa muMei.

“Otwa kaleka nale etokolo ndyoka. Onda uvu kutya elelo lyaShana olya tula miilonga okatokolitho hoka inaka kwatathana naashoka twa eta po,” Haufiku ta ti.

Okwa tindi okugwedhapo, na okwa halele Ondangwa elago.

Mayola gwaNgwediva, Angelina Angula okwa koleke koNamibian Sun kutya oya gandja omukanda gwawo momasiku 29 gaJuni nuumvo, naminista okwa holola kutya okwa mona omukanda gwawo.

“Otwe ya pe oshitopolwa tashi ashika konima yoShana Mall. Oshitopolwa oshinene shoka shuuka sigo okelila lyeshina lyokolutenda sigo okEfidi Proper. Otwe ya pa woo ehogololo opo ya hogolole mpoka ya hala.”

Mayola gwaNdangwa, Paavo Amwele okwa popi kutya yo oya gandja oshitopolwa shoka ya li ya gandja nale opo pu tungwe oshipangelo shopashitopolwa na inaya gandja oshitopolwa oshipe.

“Inatu gandja oshitopolwa oshipe, ehala ndyoka enene noonkondo nuuministeli owali owala tawu kutha po oshitopolwa shimwe mpoka andola mpoka tapu tungwa oshipangelo shopashitopolwa. Otwa li twa fala oshikumungu shetu kegumbo lyepangelo na kape na shoka sha kundathanwa natse. Ngele oya hala tu gwedheko koshitopolwa shoka otatu vulu okushininga shiikolelela keindilo lyawo.”

Opoloyeka ndjoka otayi ka kala oshitopolwa sho public-private partnership.



ILENI NANDJATO