Epangelo tali kandula po omukundu gwendumbakano lyomidhimba mokila yopolisi

Epangelo tali kandula po omukundu gwendumbakano lyomidhimba mokila yopolisi Uuministeli wUundjolowe oshowo Elelo lyoshilando shaVenduka, oya tameke okufumbika omidhimba omathele ndhoka inadhi ka talwa ko kokila yomidhimba yopolisi mOvenduka.

Oshiwike shika Uuministeli wUundjolowele owa popi kutya okutameka omwedhi Apilili sho uuministeli wa yi moonkundathana naanambelewa yelelo lyoshilando oya tokola okwaadha etsokumwe lyokukandulapo omukundu gwendumbakano lyomidhimba inadhi ka talwako mokila ndjoka.

Etsokumwe ndyoka olya kwatelamo efumbiko lyomidhimba ndhoka, ndyoka lya tameka nale kwiikwatelelwa kompango yoshilongo, pauyelele mboka wa pitithwa kuamushanga gwuundjolowele, Dr Andreas Mwoombola .

Okwa popi kutya uuministeli nelelo lyoshilando oya tsa kumwe nkene taku kandulwapo omukundu ngoka, nonando inaya muule wetsokumwe ndyoka onga omukalo gwokugandja esimaneko lyopauntu koonakusa.

Omupopiliko gwoshilando shaVenduka, Lydia Amutenya okwa kolele etsokumwe ndyoka ta popi kutya olya tulwa nale miilonga.

MuApilili uuministeli owa lombwele oNamibia Sun kutya ope na omidhimba dhili 390 mookila yoshipangelo oshowo yopolisi, nomidhimba ndhoka odha pumbwa okufumbikwa, nomafumbiko otaga ka pula oshimaliwa sha thika N$164 700.

Mwoombola ina gandja uuyelele kutya omidhimba ngapi dha fumbikwa monena nonando onzo yimwe oya yakeleko oshifokundaneki shika kutya omidhimba ndhoka dha fumbikwa inadhi pita po-20.

MuJuli gwo-2016,oNamibian Sun oya lopota kutya kape na iimaliwa yiikalekelwa ya nuninwa efumbiko lyomidhimba ndhoka inadhi ka talwa ko kokila yopoisi, nonando aanambelewa yokila ndjoka oya ningi eindilo kaahona yawo opo ya yambidhidhwe. Omatando gokumona iiyetithi yeso geli o-10 inaga vula kuningwa pethimbo ndyoka omolwa ehala ndyoka kali mo mokila ndjoka yuudha noonkondo nonando oya nuninwa owala okukala nomidhimba 24 poshikando.

Pethimbo ndyoka okwa li kwa lopotwa okila ndjoka yi na omidhimba 180 nomidhimba dhimwe ndhoka odha kala mo okutameka omvula 2009. MuMaalitsa aanambelewa oya koleke kutya omidhimba ndhoka inadhi ka talwamo mokila yopolisi odhili 120.

Okuza mpoka opwa kala oontamanana kutya olye e na oshinakugwanithwa shokukandulapo omukundu ngoka.

Uuministeli wUundjolowele owali wa popi kutya ope na omathimbo ngoka tashi vulika ohaya gandja ekwatho kopolisi mokufumvika oonakusa mboka, ihe shoka kashi shi andola oshinakugwanithwa shawo.

Omukomeho gwoNational Forensic Science Institute, Dr Paul Ludik, okwa li a popi kutya oshi li oshinakugwanithwa shelelo lyoshitopolwa muuministeli wuundjolowele okukutha ko oshinakugwanithwa shoonakusa mboka inaya ka twalwa ko kookila dhomidhimba.

Oshiwike sha piti, omukomeho gwopilisi yaNamibia, Sebastian Ndeitunga okwa popi kutya ita vulu okukoleke ngele okwa a dhika etsokumwe ndyoka tali kandula po omukundu ngoka, ihe okwa popi kutya oombinga ndhoka ndatu odha a dha etsokumwe moku ya moonkundathana dhekandulepo lyomukundu ngoka.

Onzo yimwe oya popi kutya nonando omidhimba ndhoka odhi fumbikwe ngashiingeyi, ekandulepo lyomukundu ngoka itali kalelele molwaashoka okila ndjoka otayi yakula omidhimba ndhoka ihadhi ka talwa ko kehe omwedhi.

JANA-MARI SMITH