Namibia ta dhipaga po omukalo gwomathimbo gaali

Namibia ta dhipaga po omukalo gwomathimbo gaali Mosoondaha yomasiku gatatu gaSepetemba, otayi ka kala esiku lyahugunina AaNamibia otaya lundulula oowili dhawo konima yethimbo lyokufu lyuule woomwedhi ntano.

Shoka osha landula ezimino lya ningwa kOmutumba gwoPashigwana taku yambidhidha olopota yoparliamentary standing committee ndjoka tayi yambidhidha opo Oveta yoNamibian Time Bill yi kuthe po omathimbo gopaali ngoka haga longithwa kuNamibia.

Kwiikwatelelwa kompango ndjoka, yomo-1994, Namibia ohayi mokwenye potundi 02:00 mOsoondaha yotango yomwedhi Sepetemba nokulundulukila kokufu mOsoondaha yotango yaApilili.

Ezimino ndyoka lya ninga, otali holola kutya momvula twa taalela oshitopolwa shaZambezi otashi ka kala tashi longitha ethimbo lya faathana noshilongo ashihe.

Zambezi ina kala ha longitha omukalo ngoka gwelundululo lyethimbo.

Omatompelo ga tulwa po koStanding Committee on Foreign Affairs, Defence and Security meyambidhidho lyethimbo limwe, oga kwatela mo omukundu hagu etithwa kethimbo ndyoka ngetashiya komalanditho pokati kaNamibia niishiindalongo.

Olopota oya tsikile kutya okukala taku longithwa ethimbo limwe otashi ka yambulapo iilonga pethimbo lyokufu neyambulepo lyegandjo lyomayakulo.

Olopota oya tsikie kutya sha landula oonkundathana naakuthimbinga ya yooloka, okwa hololwa kutya omalunduluko gethimbo moNamibia ohaga etitha ekanitho lyoowili dha thika pu ne momalanditho goJohannesburg Stock Exchange pethimbo lyokufu, oshowo pangeshefa dhilwe ndhoka ha ningi noshishiindalongo South Afrika.

Okwa hololwa kutya omalunduluko ngoka ohaga yi moshipala ethimbo lyokupatulula oongamba niishiindalongo naanambelewa yokoongamba oya popi kutya ethimbo limwe ohaya thiminikwa konkalo opo ya longithe ethimbo ndyoka tali longithwa kiilongo iikwawo poongamba naashoka ohashi etitha aanambelewa ya longe oowili oonde.

Oompata dhoka odha tamekwa mo-1992 koshilyo shoDTA, Anna Frank ngoka a popi kutya okwa limbililwa omolwa aanona mboka haya ende iinano iile okuya kooskola pethimbo lyokufu naashoka otashi etitha ya tameke okuya kooskola kwa luudha nokutula oomwenyo dhawo moshiponga.

Pethimbo lyoonkundatha oshikondo shelongo osha holola woo omalimbililo kutya aanona yoskola naailongi oya taalela oshiponga sho haya ende omausiku okuya nokuza kooskola.

Shoka osha etitha ostanding committee yi gandje omagwedhelo po opo Uuministeli wElongo wu tule miilonga oowili ndhoka tadhi wapalele aanaskola naailongi, pankundathana tadhi ningwa naavali oshowo aakuthimbinga melongo ayehe.

Omunashipundi gwokomitiye ndjoka oLeevi Katoma.



JEMIMA BEUKES