A pewa oomvula 12 mondjeedhililo

A pewa oomvula 12 mondjeedhililoTa pangele okupataneka egeelo ndyoka Ompangu yaTjiwarongo oya gandja egeelo lyoomvula 12 kuNatangwe Shishiveni ngoka a monika ondjo moshipotha shekwatonkonga lyokanona koomvula 12. Omulumentu gwoomvula 29 ngoka a kala ta pangulilwa oshipotha shokukwata onkonga okanona kokakadhona koomvula 12 mOtjiwarongo oomvula ndatu dha piti monena okwa monika ondjo moshipotha shoka, na okwa pewa egeelo lyokukala modholongo uule woomvula 12.

Omukalelipo gwopaveta gwaNatangwe Shishiveni okwa popi kutya otaya ka pataneka egeelo ndyoka kwiikwatelelwa komaumbangi ngoka ye na po pethimbo lyepangulo, kutya nakutula mo oshipotha okwa toto omalundilo onga omukalo gwokuyanda egeelo.

Mangestrata mompangu yopashitopolwa yaTjiwarongo, Marelize du Plessis pethimbo lyegandjo lyegeelo okwa popi kutya okwa mono kutya omaumbangi ngoka ga gandjwa kunakuninga oshihakanwa oshowo sha landula ekonaakono lyopaunamiti ndyoka lya ningwa otaga tsu kumwe.

Pethimbo lyoshipotha shoka, omundokotola okwa koleke kutya okwa ningila okanona hoka omakonaakono konima sho kwa tulwa mo oshipotha shoka muJanuari gwo-2014, nomakonaakono ngoka oga ulike kutya okanona hoka oka yiwa nako miihulo.

Pethimbo lyoshipotha shoka, omukalelipo gwopaveta gwomutamanekwa okwa popi kutya nakutulamo oshipotha okwa gandja omaumbangi giifundja omolwa uutile wokugeelwa megumbo, sho a yi kegumbo uusiku esiku ndyoka na yina yokanona oyali ye na oontamanana nomufamanekwa ngoka.

Okwa tsikile kutya konima yoontamana, omufekelwa okwa zi mo megumbo na okwa galuka mokati kuusiku nokuya mondunda ye yokulala na ina guma okanona hoka.

Mangestrata okwa popi woo kutya endopo lyoombangi mbali ndhoka dha tumbulwa kuShishiiveni na nakuninga oshihakanwa, opo dhi holoke komeho yompangu otashi limbililike.

Gumwe gwomoombangi a tseyika nedhina Ben, ngoka aniwa e li omumwayinamati gwaShishiiveni okwa ndopa okuholoka nokugandja uumbangi nonando okwa ithanwa kompangu iikando itatu.

Mangestrata okwa popi kutya Shishiiveni okwa ndopa okugandja uuyelele mpoka tapu adhika mumwayina ngoka, na okwa holola kutya onomola yongodhi yamumwayina okweyi kanithila mongodhi ye yimwe ndjoka a li a kanitha.

Natango okwa tsikile kutya olukongo lwaShishiiveni ngoka e li omutungi, omanga ina tulwa miipangeko otalu limbililike.

“Otashi limbilike kutya omutamanekwa okwa yi kOvenduka ongula yesiku ndyoka opolisi ye ya oku mu konga.”

Omutamanekwa okwii popile kutya okwa li iithanwa opo a ye niilonga kondoolopa yilwe, nayina ina vula okuninga ekwatathano naye muule wethimbo ndyoka sigo osho a tulwa miipandeko konima yoomwedhi dhontumba.

Du Plessis okwa popi kutya omutamanekwa okwa kala ta holola omaihumbato gomuntu ta yanda okutulwa miipandeko nokuya ontuku yopolisi, na okwa pula kutya omolwashike iniigandja kopolisi opo a yeleke edhina lye.

JANA-MARI SMITH