UNHCR otaka tala konkalo yondjala moAngola

UNHCR otaka tala konkalo yondjala moAngola Ehangano lyoUnited Nations Refugee Agency olya uvaneke tali ka tala konkalo yaakwashigwana yaAngola mboka taya mbombolokele moNamibia molwaashoka oya taalela ondjala moshilongo shaandjawo.

Shoka osha hololwa kominista yomakwatathano gwopaigwana, Netumbo Nandi-Ndaitwah mEtitatu omanga ta yamukula komapulo gwomuleli gwongundu yoPopular Democratic Movement, McHenry Venaani kutya epangelo otali ningi po shike mokutala konkalo yaakwashigwana yaAngola mboka taye ya moshilongo shaaheli paveta. Venaani okwa popi kutya nonando pamatompelo gopauntu kashi li mondjila Namibia a shunithe aakwashigwana mboka koshilongo shaandjawo, epangelo lyaNamibia olwa pumbwa okukwatathana nepangelo lyaAngola opo ku vule okutulwa po omilandu dhekondololo poongamba. “Otu li mekwatathano nepangelo lyaAngola okupitila momukalelipo gwawo moNamibia nomOmaandaha otwa ningi omutumba mOhangwena ngoka gwa kaliwa woo komukalelipo gwAngola,” Nandi-Ndaitwah a popi.



ETHANO: NAMPA