Omunaskola gwomOngwediva a pumwa kosheenditho

Omunaskola gwomOngwediva a pumwa kosheenditho Omunaskola gwoomvula 17 okwa lopotwa a pumwa nokusa kohauto omanga, a li mondjila okuya koskola mOngwediva ongula yEtitatu lya piti. NAMPA

OSHAKATI



Opolisi mOngwediva moshitopolwa shaShana oya patulula oshipotha shedhipago lwaashi lyoshiningilawina konima sho omuhingi gwohauto a pumu omunamimvo 17 omunaskola mondjila yaNgwediva-Oshakati ongula yEtitatu lyoshiwike sha piti.

Sho a koleke oshiponga shoka, Inspector Thomas Aiyambo gwombelewa yomauyelele goshigwana mopolisi yaShana, okwa popi kutya oshiponga shoka osha ningilwa popepi nondunda yomanwino yedhina Kitoko mOngwediva lwopotundi onti 06h39.

Aiyambo okwa popi kutya omunamimvo 33 okwa li ta hingi ohauto yombaki yoToyota okuza kOshakati uuka kOngwediva omanga nakusa a li ta taaguluka opate.

Nakusa okwa dhimbululwa kutya Monica Kathindi, a li mondondo onti 10 poskola yedhina Ekwafo Secondary School mOngwediva.

“Nakusa okwa sile pehala lyoshiponga nolutu lwe olwa falwa kokila yomidhimba yopolisi mOshakati,” Aiyambo a popi.

Aakwanezimo yanakusa oya tseyithilwa eso lye nomakonaakono gopolisi otaga tsikile.

Aiyambo okwa pula aahingi ya hinge aluhe nuukeka unene pethimbo lyoowili dhoka ondjila hayi kala yuudha.

Okwa pula aahingi natango ya gandje ompito kaayendi yokolupadhi unene aanaskola uuna taya taaguluka opate.