Ta kongo ekwatho mokutungulula egumbo lye.

Ta kongo ekwatho mokutungulula egumbo lye. TUYEIMO HAIDULA

ONAMBIBA

Olivia Mulongeni okuli metegelelo lyoomwedhi hetatu. Okwa hupu moshiponokela shoka a ningilwa kohonda ye pamwe nokamonakadhona koomvula ne. Mulongeni ota kongo ekwatho opo a vule okutungulula egumbo lye.

Johannes Simon (28) okwa hwikepo ombashu yaMulongeni ongulohi yEtitatu lya piti mOnambiba, momukunda Omatando moshikandjohogololo shaNgwediva sha landula oontamanana.

Okwa yi ontuku okuza pehala lyoshiningwanima na okwa tulwa miipandeko mEtine. Okwa holoka mompangulilo yamangestrata gwaShakati noshipotha she osha undulilwa komeho opo ku vule okuningwa omakonaakono.

Omupopiliko gwopolisi yaShana, Thomas Aiyambo okwa popi kutya Simon okwa li molugodhi nookume ke puundingosho naMulongeni okwa li a tseyithilwa. Okwa yi e ke mu taleko opo ya ye kegumbo.

Aiyambo okwa popi kutya mboka yaali oya yi kegumbo nolugodhi olwa tukuka pokati kayo.

Mulongeni okwa yi ontuku maashinda na okwa tseyithilwa lwanima kutya ombashu otayu pi.

Mulongeni okwa lombwele oNamibian Sun mEtitano kutya ohonda ye oya kala noku mu monitha iihuna uule woomvula ndatu. Okwa popi kutya omadhengo ohaga zilile piinima iishona.

Okwa tsikile kutya oontamanana nolugodhi lwesiku ndyoka olya zilile sho a tindi okupulake na ehokololo lye kutya omolwashike yali taya kondjo puundingosho.

“Onde mu lombwele kutya inandi hala okupulakena omahokololo. Omanga inandi mana okupopya okwa kwatandje pothingo nekondjo olya tameke omanga okanona ka talako.”

Mulongeni okwa popi kutya okwa tameke keena oonkondo na okwa pula okanona ke komvula ne ka tondoke ka kakonge ekwwatho.

“Onde mu vulu oonkondo molwaashoka okwa li a kolwa na onda tondoka nda landula okanona. Okwa tidhandje na okwa kambadhala okuponokelandje natango. Aashinda oye mu indike. Onde ya pula ye mu kwate omanga tatu yi kondunda yamumwameme tu ka konge egameno.”

Mulongeni omanga ina thika kumumwayina okwa dhengelwa ongodhi kaashiinda kutya egumbo lye otali pi.

Okwa popi kutya oshikando shotango ya tamanana oontamanana oonene naSimon omuJanuari gwomvula yo 2020 omanga kee na etegelelo natango na okwa tokola oku mu thiga po.

Okwa popi kutya aakuluntu oye mu lombwele a shune kumukwawo noku mwiidhidhimikila netompelo kutya pamwe ohasi uukodhi mbala.

Okwa tsikile kutya oshikando oshitiyali osho etegelelo lye li na oomwedhi hamano. Okwa popi kutya Simon okwe mu dhenge noonkondo. Okwa popi kutya ngashiingeyi ina hala we na okwa tokola oku mu thiga po. Okwa tsikile kutya aavali oye mu lombwele kutya omulumentu ngoka oteke mu dhipaga esiku limwe ngele ita thigi po ekwatathano ndyoka.

Mulongeni, yina yuunona utatu okwa thigwa pomutenya na ota kongo ekwatho opo a vule okutungulula egumbo lye.

Omaliko ge mwa kwatelwa omikanda dhe dhuukwashigwana odha pila momulilo.

– tuyeimo@namibiansun.com