‘Kape na uuyuuki’- yina yanakuninga oshihakanwa shedhipago KENYA KAMBOWESIKALI
Muule womasiku 577 ga piti, Emilia Nangula Siami okwa thiminikwa okukala a tala ehala lyoondunda mbali dhokulala moka omonakadhona gwe a dhipagelwa , sho ehala ndyoka tali vulu owala okukuthwapo miipathi yofamili yanakudhipaga.
Siami omunamimvo 51 okwa popi kutya ina itaala natango ekanitho lyomona, Naimi Ngambo Kalenga, ngoka a dhipagwa edhipago linyanyaleka kohonda ye.
Kalenga okwa dhipagwa nekuwa momukunda Sikali moshitopolwa shaKavango West.
Okwa popi kutya ofamili yanakudhipaga inayi ninga ekwatathano nayo konima yedhipago ndyoka.
Omufekelwa ngoka ngashiingeyi oku li mondjeedhililo yaAngola. Namibia naAngola kaye na etsokumwe lyokutaambadhana oonakutamanekwa.
Momasiku 16 gaAguste 2019, omufekelwa ngoka e na aanona yatatu yoomvula ndatu, ntano nahetatu nanakusa okwa ponokele yina yaanona ye omanga inaya ontuku moAngola.
Molyomakaya, oshifokundaneki shoNamibian Sun, osha talele po ofamili okutala kutya oshipotha shoka osha hulile peni.
Siami okwa popi kutya nonando oothigwa ohadhi mono ekwatho lyoshimaliwa shooN$250 okuza kepangelo kehe omwedhi osha ninga oshidhigu okusila oshisho aanona mboka pamwe naakwanezimo yalwe 12 mboka ta sile oshisho. Siami iha longo.
“Inandi nyanyukilwa shoka sha ningilwa omumwandje. Ngaashi nda popile nale kutya oye a li ta sile ofamili oshisho na osha ningilandje oshidhigu okusila oshisho ofamili ayihe, unene sho ihandi longo,” Siami a popi.
Okwa tsikile kutya okwa pandula koshimaliwa shooN$750 shoka ha mono okuza kepangelo ihe nonando ongaaka inashi gwana oompumbwe dhoka tadhi londo unene pombanda
Okwa lombwele oNamibia Sun kutya opolisi oya li ya popi naye kombinga yoshipotha shoka muKotomba gwomvula yo 2019.
“Ngele otaya ti omufekelwa okwa tulwa miipandeko moAngola omolwashike itaye mu e ta a pangulilwe oshimbuluma shoka a longo.”
Sho a ningilwa omapulo, Omukomeho gwOpolisi yaNamibia, Sebastian Ndeitunga okwa popi kutya kape na e yo komeho lya sha mokweeta omutamanekwa moshilongo.
kenya@namibiansun.com