Aniilonga yaNovaNam inaya nyanyukilwa oskema yiipambuliko yaaniilonga

Aniilonga yaNovaNam inaya nyanyukilwa oskema yiipambuliko yaaniilonga Aaniilonga mehangano lyokukwata oohi otaya popi kutya inaya ningwa noyo oonkundathana dholela kombinga yoskema yiipambuliko ihe elelo lyehangano ndyoka otali ipatana oshinima shoka. JEMIMA BEUKES

Ø NovaNam ta li aniwa nomadhina gaaniilonga

Oonakumona uuwanawa okuza moNovanam Staff Share Trust oshiwike sha piti oya gandja omukandanyenyeto gwawo kehangano ndyoka taya longele taya ningi omapulaapulo ketulo miilonga lyooskema dhontumba ndhoka taya popi kutya dha nuninwa okugandja uuwanawa kelelo naakomeho mehangano.

Omukandanyenyeto ngoka ogwa leshwa kuJulius Iipinge, ngoka a popi kutya konima nkene kwa totwa oNovanam Staff Trust, aaniilonga inaya tseyithilwa nawa nkene taya vulu okumoa uuwanawa okuzilila moskema ndjoka.

“Sigo onena tse aaniilonga inatu tseyithilwa kutya otwa pewa iipambuliko yi thike peni na otatu vulu ngiini okumona uuwanawa okuza kehangano okupitila miipambuluko mbyoka. Tse nga aaniilonga natango inatu pewa uunzapo onga aaniipambuluko mehangano.”

Iipinge okwa gwedhapo kutya aaniiloga oya nongele kutya oya pewa iipambuliko yi li poo2 041 500 yongushu yoomiliyona mbali na oya kalelapo oopresenda mbali dhuumwene mehangano lyoNovaNam Limited.

“Otatu pula NovaNam opo a gandje ombili moshigwana kepangelo lyaNamibia oshowo koshigwana molwaashoka ehangano olya longitha oshiluku shotango shOmpango yoMarine Resources Act 2000, ndjoka otayi pula egandjo lyoopresenda 51 dhuumwene kaakwashigwana yaNamibia.Kungame NovaNam okwa longitha ompango ndjoka opo a vule okumona esilohenda lyiifuta yiishoshela yepangelo a vule okukala ta futu iishoshela yi li pevi. Okomitiye yetu oya pyakudhukwa okukundathana nehangano opo tu vule okukandulapo uupyakadhi mbuka,” Iipinge a popi.

NovaNam okwa popi kutya oya ningi omitumba iikando yontumba nomunashipundi gwoskema ndjoka, Abraham Nekwaya nokomitiye momasiku 30 gaNovemba showo 1 lyaDesemba momvula yo 2020 oya gandja iiyetwapothaneko kehangano.

Ehangano olya gwedhapo kutya omitumba dhoka mbali odha lyandulwa komutumba gwa ningwa nominista Albert Kawana.

jemima@namibiansun.com