Oosekuriti otadhi thindilwa kongudhi Taya tonatele oomiliyona ihe otaya futwa uumaliwa uushona Oonkundathana dhokuyambula po onkalo yiifuta yaaniilonga aakeleli yomaliko ano oosekuriti odha adha okwena kwa thita sho oombinga mbali moshikumungu shoka inadhi adha etsokumwe. Okwa adhika okwena kwa thika pokati kaaniilonga yoosekuriti nehangano li lilepo aagandji yiilonga moshikondo shoka, moka oosekuriti dha holola kutya odha loloka okumonithwa iihuna nokufutwa oondjambi dhili pevi noonkondo.Omahangano gelilepo konyala aaniilonga ya thika po-17 000 oga popi kutya ngele inaku adhika etsokumwe nena oshilongo nashi kale shiilongekidha molwaashoka oosekuriti odha loloka.
Omasiku ga piti, amushanga-ndjai gwoNamibia Transport and Allied Workers Union (Natau), John Kwedhi, okwa popi kutya aaniilonga mboka otaya longo monkalo yanayipala nayi.
Omahangano oga popi kutya okwena kwa thita okwa adhika mOmaandaha sho ehangano lilipep aagandji yiilonga moshikondo shoka lyoSecurity Association of Namibia (SAN), lya tindi okutsa kumwe naashoka tashi pulwa komahangano ge lilepo aaniilonga. Omahangano gaaniilonga ngashiingeyi otaga pula iifuta yooN$12.50 okuza poN$15 mbyoka yali taya pula nale naandjoka otayi ka kala ondjambi andola yooN$3 300 komwedhi.
SAN okwa tokola owala aniwa okufuta ooN$7.50 mowili oshowo N$8.75 kaaniilonga mbo ka ya longa uule womvula, naashoka otashi e ta ondjambi yooN$2 310 komwedhi. Omahangano ngoka taga kondjitha oshikumungu shoka na oge lilepo aaniilonga oga tumbulwa kutya Natau, Namibia Independence Security Union (NISU) oshowo Namibia Security Guards and Watchman Union (NASGWU), meyambidhidho lyoTrade Union Congress of Namibia (Tucna). Omahangano oga kunkilile kutya uuna oonkundathana dhoka dha ndopa nena otashi ka kala uupyakadhi unene kuNamibia molwaashoka omaliko ogendji otaga ka kala inaga tonatelwa. Omupresidende gwoTucna, Paulus hango okwa popi kutya nge tashiya koondjambi kadhi thike pamwe, Namibia okuli ponomola yotango naashoka otashi eta omwaka omunene poondjambi.
Okwa popi kutya oshinakugwanithwa shomahangano gaaniilonga okulonga nuudhiginini nokuyambulapo oonkalo dhaaniilonga mokukandula po oluhepo nokudhindila pevi okwaaha thike pamwe. Okwa gwedha po kutya aaniilonga oyendji moNamibia itaya vulu iinima oyindji na otaya hupu shokadhila.
Ehangano lyoSAN, olya li lya popi kutya oondjambi dhoka tadhi pulwa komahangano ngoka gaaniilonga odhili pombanda unene, na kadhili pauyuuki.
Aakalelipo yehangano lyoSAN, inaya monika opo ya tye sha kombinga yonkundana ndjika omanga inayi nyanyangidhwa.
JANA-MARI SMITH