Aahingi yootaxi ya hala onkalonawa yiilonga Aahingi yotaxi noombesa dhiinano iile ya hala omauwanawa onga aaniilonga Ehangano lyoNamibia Transport and Taxi Union (NTTU) olya gandja omukanda gwomagwedhelepo kuKomufala gwAaaniilonga opo ku ningwe omatsokumwe pokati kaahingi yootaxi naagandji yiilonga onga omukalo gwokuyambulapo onkalonawa yiilonga yaahingi yootaxi. Omagwedhelepo ngoka oga landula omitumba dha ningwa nUuministeli wIilonga nOmalweendo oshowo Uuministeli wAaniilonga.Pethimbo lyomitumba dhoka dha ningwa omahangano lyoNamibia Bus and Taxi Association (Nabta), Namibian Transport Reform Association (NTRA), noNamibia Public Passenger and the Transport Association (NPPTA) oga pulwa opo ga kundathane iikumungu yiilonga pokati kaaniilonga naagandji yiilonga.
Shika osha landula ehololomadhilaadhilo ndyoka lya ningwa kaahingi yootaxi moshilandopangelo, na oya ningi omatilitho gokuninga ehololomadhilaadhilo moshilongo ashihe uuna omakemo gawo inaga talika.
Omupresidende gwoNTTU, Werner January, okwa lombwele oNamibia Sun kutya omagwedhelopo ngoka oga pewa ombelewa yaKomufala gwAaniilonga oshowo komahangano gatatu gaagandji yiilonga, ihe aniwa ehangano lyoNTRA olya tindi okutaamba omukanda ngoka.
Momagwedhelepo ngoka NTTU okwa hala okukala ehangano li lilepo aaniilonga aahingi yootaxi opo ku vule okukondololwa onkalo yiilonga moshikondo shoka.
Okwa hololwa kutya aaniilonga mboka kaye na egameno lyopankalamwenyo, na oye wete kutya inaya yalulwa onga aaniilonga. Ehangano ndyoka otali pula onkalonawa yiilonga moshikondo nokutula andola miilonga ondjambi yopetameko yaaniilonga yo ya vule okukala haya mono uumbaapila womafutilo goondjambi dhawo wokomwedhi.
Okwa ningwa omagwedhelepo opo aahingi yootaxi yiinano iifupi ya kale taya mono ondjambi yooN$4 000 komwedhi omanga aahingi yinano iile ya kale haya mono N$5 500 kwa gwedhwa oo20c/km.
Okwa ningwa omadhelepo opo aahingi yuumbesa woIveco ya kale haya mono ondjambi yoo N$8 700 okwa gwedhwa oo 30c/km, omanga mboka yuumbesa uushona wiinano iile hawu ningwa oshilage ya mone N$5 500 oshowo 30c/km. Aahingi yuumbessa wopokati mboka hawu ningilwa oshilage andola otaya mono N$7 500 oshowo 40c/km. aahingi yuuIveco mboka hawu ningilwa oshilage andola otaya mono ooN$10 300 oshowo 50c/km.
January okwa popi kutya osha simana aahingi ya kale haya mono uuplayslip nokuhulitha po omukalo gwokumona ondjambi yokomisi.
Okwa gwedha po kutya aahingi mboka naya kale taya vulu okukala iilyo tayi vulu okumona omauwanawa koSocial Security, openzela, omakwashilipaleko giiponga nomakwashilipakelo gonkalamwenyo niipangelo.
Okwa tothwamo opo omauwanawa agehe noompango dhiilonga dhi landulwe ngaashi tashi uthwa kekotampango lyaaniilonga.
January okwa popi kutya aaniilonga nayo oya pumbwa okwiiyutha komatsokumwe gawo giilonga na oyoyene taya ka futa uutekete wokupogola oompango dhomoondjila mboka tawu ka pewa mboka taya pogola.
ELLANIE SMIT