Tu ka tsakanekeni omapenda getu- Haseb Ongundu yaadhani yuudhano wokutondoka yoNamibia Paralympic okwa li kwa tegelelwa yi thike moshilongo ongulohi yohela naayambidhidhi oya pulwa opo ya ka tsakaneke aadhani mboka pokapale.Omunambelewa gwoNamibia Sports Commission’s (NSC), Walter Haseb, okwa pula oshigwana opo shi gongale pokapale nokutsakaneka aadhani mboka. Aadhani mboka oshowo osheendo ashihe osha li sha tegelelwa dhi thike pokapale kaHosea Kutako International Airport potundi 21:30 ohela.
Haseb okwa popi kutya egalukilo kegumbo lyongundu ndjoka olimwe li na ondjokonona molwashoka ongundu ndjoka otayi galukile kegumbo nomapapa gatano.
Pethimbo omanga onkundana ndjika inayi nyanyangithwa, NSC okwa li ta ningi oompangela dhondalasipota yoshali yokufala aayambidhidhi kokapale.
Haseb okwa popi kutya mboka itaya mono ompito yokuya kokapale, otaya ka mona ompito yokumona aatondoki mboka, nena (mEtine).Amushanga ta kalelele mUuministeli wOmaudhano, Alfred Ilukena, oye ta tsakaneke ongundu ndjoka,.
Nena oprogramma otayi tameke potundi 09:00 poSnyman Circle mepandanda lyoIndependence Avenue okuya poUN Plaza moKatutura.
Oshituthi shonena otashi kwatelwa komeho komupevi Minista gwOmaudhano, Agnes Tjongarero, omanga omaunashipundi gwo NSC taka popitha ongundu ndjoka yaadhani.
Uuministeli wAantu taya lumbu nOmaulema, NamPower, omukomeho gwosheendo shoParalympic Games oshowo aatondoki Ananias Shikongo na Johannes Nambala otaya ka popya poshituthi shoka tashi ningwa nena.
Namibia okwa hulile e li ponomola ontihetatu mokati kiilongo 40 yaAfrika mbyoka yakutha ombinga muudhano mboka wo2016 Paralympic Games wa ningilwa moRio de Janeiro, Brazil.
Namibia okwa sindana oombandi ntano nokutota ondjokonona ompe okuza poombandi ndatu ndhoka dhali dha sindanwa koshilongo.
Omapapa ngoka oga sindanwa kuJohannes Nambala naAnanias Shikongo.
Nambala okwa sindana oombandi mbali omanga Shikongo a sindana oombandi ndatu.
KAINO NGHITONGO