Ofamili ya thigwa moluhepo komulilo Ofamili yaantu 20, mwa kwatelwa aakokele yatatu, aakuluntu yahamano oshowo aanona 11 oya dhigwa kaaye na sha sho egumbo lyawo lya hanagulwapo komulilo.Elago enene momulilo ngoka inamu ehamekelwa omuntu.
Pahapu dhaakwanezimo mboka yomomukunda Onangama momudhingoloko gwaNgenga mOshitopolwa shaHangwena, oshiningwanima osha holoka lwopotundi 16:00 mEtine lyoshiwike sha piti, sho okanona kokamati koomvula 15 okuza megumbo ndyoka kali taka hwike iiyagaya oshinano oshishona okuza pegumbo. Okwa li kwa tukuka ombepo onene ndjoka ya etitha omulilo gu kwate kondunda yimwe megumbo nokweetitha omulilo.
Ofamili oya kanitha konyala omaliko agehe okuza megumbo lyawo moka ya kala uule woomvula 40.
“Kapwa li shoka tatu vulu okuninga omulilo ogwa taandele meendelelo na molwaashoka ngame ohandi endele komampango. Gumwe gwomaatekulu yandje okwa kwathandje opo tuye mepya na otwa tala nkene egumbo lyetu tali popi,” omunamivo 79, Jolonimo Ngholoimune ta ti.
Ngashiingeyi ofamili ndjoka otayi kongo omakwatho na oya popi kutya otaya tambula kehe omayambidhidho ngoka taya pewa.
Mwene gwomukunda ngoka, Cleophas Daniel okwa popi kutya ombelewa yakansela gwawo oga gandja eyambidhidho lyooshako ndatu dhuusila wepungu na ota pula oshigwana shi kwathele aakwanezimo mboka.
KENYA KAMBOWE
