Ooplota dhomOshakati dhi li pokupwaKonyala ooplota dhomalukalwa dha thika po-807 odhi li pokupwa okuwapalekwa mOndoolopa yaShakati, onga oshitopolwa shoprograma yoMassive Urban Land Servicing Project (MULSP). Opoloyeka yo MULSP oya nuninwa okukandulapo ompumbwe yomagumbo Ewapaleko lyooplota dhoka mwakwatelwa ominino dhomeya, ominino iiyekelwahwi, oondjila nomalusheno otali pula Uuministeli wEyambulepo lyOondolopa nIitopolwa oshimaliwa sha thika poomiliyona 139 momudhingoloko gwaEhenye. Momudhingoloko gwa Ehenye 2 no 7 omayakulo ngoka otaga ka pula oshimaliwa shoomiliyona 48 omanga mEhenya 3 no-8 ewapaleko tali ka pula oshimaliwa shoomiliyona 44 omanga oomiliyona 47 otadhi ka longithwa mEhenye proper. Omayakulo ngoka otaga ningwa kehangano lyoNexus Group., melongelokumwe no Windhoek Consulting Engineers (WCE), Lithon Project Consultants and Conselect Engineering .
Elelo lyOndoolopa yaShakati olya gandja evi momudhingoloko gwEhenye oshowo Ompumbu koprogramma yoMULSP sha landula sho Omupresidende Hage Geingob omvula ya piti a pula ondolopa ndjoka yi tothemo ehala mpoka tapu vulu okuwapalekwa ooplota dha thika po- 2 932.
Oshitopolwa shotango mEhenye otashi ka kala nooplota 326 omanga moshitopolwa oshitiyali ooplota 7 320 omanga moshitopolwa 3 no8 otamu kala ooplota 161 kehe.
Omupopiliko gwOndoolopa yaShakati, Katarina Kamari okwa popi kutya ooplota dhoka otadhi ka kala dha pwa okuya muJanuari gwomvula yo-2017.
“Oprogramma yoMULSP otayi pula nawa komeho nomahangano ngoka taga wapaleke omahala ngoka oga longa shi thike poopresenda 52 moshitopolwa 2 no 7 omanga 3 no 8 iilonga oyi li poopresenda 54 omanga mEhenye proper iilonga oyi li poopresenda 48.
Pethimbo kwa tamekithwa iilonga mbyoka muJanuari, Minista Sophia Shaningwa okwa li a popi kutya oprogramma ndjoka oya nuninwa oku wapaleka omahala gomagumbo gaakwashigwana.
Uuna ooplota dhoka dha manithwa otaku ka tamekwa newapaleko lyooplota mEhenye Extension 1, Ompumbu Extensions 1, 2, 3, 4, 5 no6 oshowo mOmpumbu proper. Momudhingoloko ngoka otamu ka za ooplota 2 125.
ILENI NANDJATO