Omalongekidho golweendo lyokuya koCassinga ga tamekeOonakuhupa moshiponokela shaCassinga otaya hiwa opo ya ka kuthe ombinga molweendo olutiyali ndoka lya nuninwa okukatalela po ehala lyoshiponokela ndyoka tali adhika mUumbugantu wAngola. Momvula twa taalela ooluhupe yaCassinga oya hala oku ka dhimbulukila esiku ndyoka pehala lyoshiningwanima 0 Nuumvo konyala oonakuhupa moshiponokela shoka ya thika po-300 oya yi lyotango pehala ndyoka konima yoshiponokela shoka sha ningwa momasiku ga-4 gomwedhi Mei momvula yo-1978, nokudhimbulukila esiku ndyoka pehala mpoka. Omunashipundi gwOkomitiye yOonakuhupa moshiponokela shoka Ignatius Mwanyekange, okwa lombwele oNamibian Sun kutya otaya pangele okuya kehala ndyoka oshikando oshitiyali na oya kala nokuninga omitumba niilyo yokomitiye.Mwanyekange okwa pula AaNamibia ayehe ye ya wayamine molweendo ndyoka na okwa popi kutya etalelepo ndyoka otali kala oshinima shokomvula.
Okwa popi kutya oya hala okuninga omalongekidho omanga ku na natango ethimbo ele okuya kesiku ndyoka, opo kaya endulule nokumona omaupyakadhi ngoka ya dhidhilike pethimbo lyolweendo lwawo lyotango. Okwa popi kutya ope na aantu mboka yali ya nyenyeta kutya inaya tseyithilwa kombinga yolweendo ndoka.
“Nuumvo otwa hala omalongekidho taga ningwa nethimbo opo tu yande omalongekidho gomeendelelo. Otwa hala woo okugandja omauyelele gomondjila komalelo gaNamibian nAngola,” Mwahanyekange ta ti.
Olweendo ndoka ohalu futilwa koonakukutha ombinga yoyene naMwanyekange okwa popi kutya mboka ya hala okuya molweendo oya pumbwa okufuta oshimaliwa shooN$3 375 okuya pehulilo lyomwedhi Maliitsa momvula twa taalela.
Iimaliwa mbyoka oya kwatelamo owala omalweendo niikulya onkene aakuthimbinga okwa tegelelwa ya faalele ootenda dhawo dhokulala niinguma yawo. Okwa popi kutya iifuta mbyoka otayi vulu okufutwa komweedhi uule woomwedhi 9, moka otaku futwa ooN$375, na otayi tulwa koakaunda yombaanga yokomitiye ndjoka.
Komauyelele ogendji, Mwanyekange ota monika konomola yongodhi 081 256 9840. Mwanyekange, pehala lyoonakuhupa moCassinga okwa gandja omahekeleko kofamili yaNgoloneya gwOshitopolwa shaCunene moAngola, António Didalelwa, ngoka a hulitha omasiku ga piti.
Okwa popi kutya, Didalelwa okwa li gumwe gwomaapopi pethimbo ya ningi edhimbuluko lyawo omvula ya piti.
KENYA KAMBOWE