Mangestrata a thigi po iilonga ina manitha oshipothaEikutho miilonga lyaMangestrata gwaVenduka ngoka a ndopa okumanitha epangulo moshipotha shedhipago lyaashi lyoshiningiawina, otashi utha kutya oshipotha shoka otashi tamukululwa konima sho sha kala mompangu uule woomvula 7. Etamekululo lyoshipotha otashi ka pula oshimaliwa oshindji 0 Omukalelipo gwopaveta oshowo epangelo oya popi kutya mangestrata nale ngoka a kala a kwatela komeho oshipotha shedhipago lyaashi lyoshiningilawina, Kaulikalelwa Nghishitende, ita vulu okwiiyoga koonyala nokuthigapo oshipotha shoka ine shi manitha.Okwa gandja omayele opo mangestrata ngoka uulikwe pakathimbo opo a vule okumanitha oshipotha shoka , nokakomisi kOomangestrata oka zimine kutya otaka vulu okuninga ngaaka, ihe Nghishitende okwa popi kutya itashi ka vula okuningwa.
Tuhafeni Muhongo okwa popi kutya kasha li pauyuuki nomondjila okutamukululitha oshipotha shoka na okwa popi kutya Nghishitende ina ganda omatompelo gothaatha kutya omolwashike ina manitha oshipotha shoka. Muhongo okwa popi kutya uuna kwa tamekululithwa oshipotha nena otashi ka pula oshimaliwa oshindji, ngele okuza kombinga yepangelo nenge komutamanekwa.
Okwa popi kutya omaumbangi agehe moshipotha oga gandjwa onkene ke wete kutya omolwashike oshipotha shoka tashi vulu okukala inashi manithwa.
Mangestrata Alweendo Sebby Venatius okwa lombwele Muhongo kutya shoka tashi vulu okuningwa po okutamekulula owala noshipotha shoka.
Muhongo sho a popi kutya Nghishitende ota vulu okwiithanwa opo a manithe oshipotha shoka, Venatius okwa popi kutya ngele omuntu okwiikutha miilonga nena kuna we okondolola yasha komuntu ngoka.
Muhonogo okwa lombwele oNamibian Sun kutya, ponkatu ndjika, omupanguli nale moshipotha shoka ota vulu okuninga etokolo nokulisha nga, lyo tali pewa omupanguli ngashiingeyi e li leshe.
Momasiku gaali gaSepetemba, mangestrata Rina Horn okwa shanga kutya Okakomisi kOomangestrata oka popi kutya oka pyakudhukwa okushuna pakathimbo miilonga mangestrata Nghishitende opo a vule okumanitha oshipotha shoka, molwaashoka shoka inashi manithwa etokolo owala moshipotha.
Nonando ongaaka Horn okwa popi kutya Nghishtende okwe mu tseyithile kutya ita vulu okushuna a ka longe nokumanitha oshipotha shoka nomatompelo geshiwike owala kuye, na okwa popi kutya oshipotha shoka nashi tamukulule owala.
Sho a ningilwa omapulaapulo mEtitano, Nghishitende, ngoka monena ta longele mOrange okwa popi kutya ita vulu okupopya kombinga yoshikumungu shoka molwaashoka ye okwa gandja nale omatompelo ge ngoka ga li ga uvikako.
Onkundana kutya oshipotha shoka otashi tamekululwa oyi li edhengo pomutima kuModdesty Farmer, yina yaRiozaan Freyer ngoka onkalamwenyo ye ya lundululwa koshiponga oshinyanyaleki shoka sha holoka omimvo heyali dha piti.
Sho onkalamwenyo ye ya lundululwa koshiponga shoka sha holoka muFebruali gwo-2009, Farmer okwa thiminikwa konkalo okuthiga po iilonga ye opo a ka sile omonamati oshipwiyu.
Muule woomvula heyali dha piti, Farmer okwa kala ta yi koompangu, sho George Petschnig, tamanekelwa oshipotha shedhipago lyaashi lyoshiningilawina konima sho opolisi ya mono kutya oye a li omuhingi gwoshiyenditho shoka sha ningi oshiponga na osha dhipaga aantu yaali.
Petschnig okwa tindi ondjo moshipotha shoka na okwa popi kutya haye a li omuhingi gwoshiyenditho shoka sha etitha woo a kanithe oshitopolwa shokwaako kwe.
Farmer okwa holola omaiyuvo ge gonayi omolwa etamekitho lyoshipotha shoka.
Muhongo okwa popi kutya sho Nghishitende ta ulike kutya ke na owino yokumanitha oshipotha shoka itashi ulike ethano ewanawa sho ina mana iilonga ye omanga a li omuniilonga gwepangelo ha mono ondjambi.
Okwa lombwele oNamibian Sun kutya uuna oomangestrata taya thigipo iilonga naya kwashilipaleke kutya oya manitha iilonga mbyoka ye na momake opo shi kale oshipu kwaamboka ya gumwa koshipotha shoka oshowo megandjo lyuuyuuki ngaashi Ompango yooMangeatrata yomo-2003 tayi utha.
Konima sho oshipotha shoka sha li sha pulakenwa mompangu momwedhi Desemba omvula ya piti, Nghishitende okwa li uundulile etokolo moshipotha komasiku 20 gaJanuari nuumvo ihe sho esiku ndyoka lya thikana okwa lombwele ompangu kutya etokolo inali manithwa noshipotha osha undulilwa kuApilili oshowo kuJuli.
Oshiwike sha piti, mangestrata Venatius okwa undulile oshipotha shika komasiku 20 gaJanuari momvula twa taalela.
JANA-MARI SMITH