Iivula-Ithana a pula aalongi kaya ye mekanka 0 Ominista yIikwameni, Pendukeni Iivula-Ithana, okwa pula aalongiskola kaya kuthe ombinga mekanka ta popi kutya ekanka otali ka guma nayi aanona yoskola.“Ondi shishi kutya eithano lyuulongi olya kala nale li na oshisho nohole yaanona. Otandi mu pula aalongi aaholike kamu ninge omatokolo ngoka taga ka ya moshipala onakuyiwa yaanona yoskola,” Iivula-Ithana ta ti.
Iivula-Ithana okwa popi ngaaka mOlyomakaya pethimbo kwa lukululwa oskola yaUukwandongo Combined School mOshitopolwa shaMusati ndjoka ya lukilwa omukuluntuskola gwawo gwotango Oiva Tshiikwa ya Tshivute.
Aalongi moNamibia inaya pyakudhukwa okutaamba omagwedhelo goondjambi noopresenda 5, ngoka ga gandjwa kepangelo na otaya pula opo ya gwedhelwe noopresenda 8.
Okutameka oshiwike sha piti aalongiskola oya kala taya hogolola ngele otaya zimine okuya mekanka nenge ahowe.
Ndika ethimbo edhigu noonkondo sho aanaskola yondondo onti-10 no-12 kwa tegelelwa ya shange omakonaakono gawo.
Okwa popi kutya aalongi oya pumbwa okutala koombinga adhihe nonando otaya hupu nuudhigu, naya tale woo konkalo yeliko lyoshilongo.
KENYA KAMBOWE