Ya hala eidhopo mo lyaShaningwa mekondjelo lyevi mOmatandoElelo lyondooopa yaNgwediva oli na einekelo kutya Ominista yOmayambulepo gOondoolopa niitopolwa, Sophia Shaningwa otayi kiidhopa moontamanana dhevi pokati kelelo ndyoka naakwashigwana yomomudhingoloko gwaMatando. Aakwashigwana oya hala omayamukulo moshikumungu shevi mOmatando Elelo lyondoolopa olya lopota kutya aakwashigwana yomOmatando 1,2 no 3 otaya shunitha monima omayambulepo gondoolopa momudhingoloko gwawo. Aakwashigwana mboka aniwa otaya pula ya uvithweko kutya osha ende ngiini omikunda dhawo dhi ninge oshitopolwa shondoolopa mo-2003 omanga inaya tseyithilwa. Oya hala omapulo okuza kelelo lyondoolopa oshowo kelelo lyoPamudhugululwakalo gUukwanyama.Mayola Angelina Angula, okwa koleke koshifokundaneki shoNamibian Sun kutya okwa li a fala Shaningwa komudhingoloko ngoka, pethimbo lyomauliko giipindi mondoolopa ndjoka ngoka opo ga hulu, opo Shaningwa a ka tale komudhingoloko ngoka na oku na einekelo kutya otaka idhopo moshikumungu shoka.
Angula okwa popi kutya elelo olya mono evi ndyoka momikunda dhoka ndatu mo-2003, ihe ooyene yomahala ya tameke taya landitha po ooplota dhawo kaakwashigwana mboka ya hala okukala popepi nondoolopa nooyene yomikunda oya kala taya gandja uumwene wevi kaakwashigwana mboka.
Okwa popi kutya otaya kutha ko ehala ndyoka molwaashoka olya metwa nale naamboka taya ka futwa oomboka owala ya li poo manga evi inali metwa. Mboka ye yapo konima sho evi lya metwa nale otaya ka yiwa nayo moonkundathana nongele otaya vulu oondando dhooplota nena otaya pewa ompito ye dhi landepo nongele itaye dhi vulu nena otaya ka thiga po ehala ndyoka.
Mboka ye li mpoka tapu ka enda oopate nominino dhiiyekelwahi nomeya nena otaya ka dhiga po ehala ndyoka oshali na itaya futwa.
Omunashipundi gwokomitiye yaakwashigwana mboka, Linekela Shipindo okwa lombwele oNamibian Sun kutya, yo inaya landa ooplota ihe oya pewa evi kaakwanezimo yawo naavali yawo opo ya vule okutunga omagumbo gawo.
“Aakwanezimo yetu inaya lombwelwa kutya oyeli oshitopolwa shondoolopa sigo omo-2012 sho elelo lyondoolopa lya li lya hala okuhanagulapo omagumbo gawo tali popi kutya oga tungwa pwaahena epitikilo. Otwa pumbwa uuyuuki molwaashoka aantu oyendji mOmatando mboka ya gumwa konkalo ndjika oya kalapo ethimbo lyoomvula dha thika po-10, omanga ehala ndyoka inali tulwa momake gondoolopa,” Shipindo ta ti.
Pambaapila, ehala ndyoka olya tulwa momambo gepangelo kutya olya ninga ehala lyondoolopa yaNgwediva mo-2012. Shipindo okwa popi kutya yo itaya pataneke omayambulepo gondoolopa ihe oya hala omahala gawo ga shangithwe naamboka taya gumwa ya futwe.Elenga enene lyaNamutayi, Amon Shipanga okwa zimine nokukoleka kutya ooyene yomikunda dhoka oyali ya futwa ihe okwa gandja uusama kelelo lyondoolopa sho inali tseyithila aakwashigwana pethimbo.
ILENI NANDJATO