Oondjila yaKwame Nkrumah naImmanuel Shifidi tadhi longwa Elelo lyondoolopa yaShakati olya tamekitha iilonga yokuwapaleka nokuthitika omalambo ngoka taga adhika moondjila dhomapandanda gondoolopa ndjoka.Ondjila yaKwame Nkrumah nepandanda lyaaImmanuel Shifidi ndjoka yi na uunene woshinano shookilometa 4.5 oya kala tayi uvitha nayi aahingi naahingi yootaxi unene oya nyenyeta ondjila ndjoka.
Opoloyeka ndjoka otayi ka pula elelo lyoshilando oshilimaliwa sha thika poomiliyona 24, nehangano lyoZhong Mei Engineering Group olyo tali longopo iilonga mbyoka.
Omupopiliko gwelelo lyondoolopa ndjoka, Katarina Kamari, okwa popi kutya opoloyeka ndjoka oya nuninwa okulongulula oondjila dhoka mbali nokudhi tula pamuthika opo dhivule woo okukala tadhi tilehi omeya pethimbo lyomuloka.
Kamari okwa popi kutya iilonga otayi manithwa muule womvula yimwe.
Elelo lyondoolopa olya pula oshigwana shi kale shiidhidhimika pethimbo lyiilonga nokugandja elongelokumwe. Ehangano ndyoka tali longo oondjila dhoka otali ka tameka nombinga yimwe tango opo ku vule okugandjwa ompito yokupita kwaamboka ye na omagumbo gawo nenge oongeshefa momapandanda ngoka.
Kamari okwa popi kutya aalongithindjila naya tegelele pu pite ethimbo uuna oondjila dhoka dha tulwa oteya ompe opo dhi vule okukuta omanga inaya tameka okulongitha ishewe oondjila dhoka tadhi longwa.
KENYA KAMBOWE