Aakwiita naapolisi taya tungilwa omagumboOkwa tamekithwa iilonga yetungo lyomagumbo gaakwiita naapolisi gathika po-11 000 mOkamba yaakwiita yaOsona popepi nondoolopa yaKahandja. Shika oshili oshiyetwapo sha nuninwa egandjo lyomalukalwa golela koshigwana Omupresidende Hage Geingob okwa kwatele komeho oshituthi shepatululo lyiilonga yetungo lyomagumbo ngoka taga tungwa mOsona na ogli oshiyetwapo shOshiputudhilo shoGovernment Institutions Pension Fund (GIPF), melongelo kumwe nehangano lyoPreferred Investment Property Fund (PIPF).Sho a popi poshituthi shoka, Omunambelewa Omukuluntu gwo GIPF, David Nuyoma okwa popi kutya oshiputudhilo shawo osha uvaneke okugandja oopresenda dha thika po-30 mokutunga omagumbo nokukwashilipaleka kutya ondungethaneko yoHarambee Prosperity Plan (HPP) otayi longo ngaashi ya nunimwa.
Oshituthi shoka osha endele pamwe nemanitho lyewapaleko lyoshitopolwa shotango shOsona Village shoka shi na ooplota dha thika po-400.
“Omayambukepo ngaka otaga ka ningwa moshotopolwa shevi ndyoka lya wapalekwa moka tamu ka kuthwa omahala gokutunga omagumbo ga thika po -419 oshowo omagumbo ga thika po- 11 000,” Nuyoma ta ti.
Okwa popi kutya opoloyeka ndjoka oya nana aaniilonga moshikondo shaakwiita nopolisi oyendji sho ya yakula nale omaindilo ga thika po-1 500.
Sho a gandja oshipopiwa she, omupresidende Geingob okwa pandula oshiyetwapo shoka ta popi kutya oshi li sha simana mokukandula po ompumbwe yoshigwana.
Geingob okwa popi kutya aakwiita naapolisi oye na oshinakugwanithwa oshinene na oya tegelelwa ya gwanithepo iilonga yawo kehe esiku ihe otaya gwanitha po ngiini iilonga yawo ngele kaye na omalukalwa gokuza.
Omuleli okwa pula ku tulwe miilonga iiyetwapo oyindji yoludhi ndoka, opo ku vule woo okugandjwa omagumbo kaaniilonga yalwe ngaashi aalongiskola oshowo aapangi moshilongo ashihe.
Nuyoma okwa popi kutya konima nkene ya tula poshitaafula ondungethaneko ndjoka mo-2008, oshimaliwa sha thika poobiliyona 3.3 osha nuninwa opoloyeka ndjoka.
Iinima yilwe ya pondolwa okupitila moprogramma ndjoka ongaashi ewapaleko lyooplota dhomagumbo dha thika po-1 700 moshilongo ashihe, etungo yomagumbo ga thika po-559, oshowo iifuta yomikuli dhomagumbo ga thika po- 1 810 netungo lyomahala goongeshefa.
DENVER ISAACS