Omahogololo gaalongiskola taga tsikileAalongiskola omayovi onkene taya tsikile nokuninga omahogololo gawo ngele otaya popile okuya mekanka nenge ahowe. Omahogololo oga tsikile nonando okwa holoka omaimbo galwe ihe oNamibia National Teachers’ Union (Nantu) oya popi kutya omaupyakadhi ngoka otaga kandulwa po meendelelo.
Omanga omahogololo inaga tameka mEtiyali, oongoloneya yiitopolwa oya kala taya popitha aalongiskola opo ye ya uvitheko kaya hogolole okuya mekanka ihe miitopolwa oyindji aalongiskola inaya ya kiigongi mbyoka nomahala ogendji oga kala amwasha.
Moshitopolwa shaKhomas omahogololo oga tameke mEtiyali na okwa li kwa tegelelwa ga manithwe potundi onti:18:00 opo ku tamekwe neyalulo lyomawi gaahogololo.
Omahogololo miitopolwa ngaashi Erongo, Kunene, Kavango West noHardap oga tameke mEtitatu.
Amushanga gwoNantu, Basilius Haingura okwa lombwele oNamibian Sun kutya omahogololo ogali ka katekwa mEtiyali molwaashoka oombapila dhokuhogolola kadha li dha zimininwa natango na inadhi vula okutumwa kombelewa dhiikandjo yelongo ya yooloka moshilongo ashihe pethimbo.
Omahogololo ogali ge na okutameka potundi onti- 13:00, ihe oga ka tameka owala potundi onti- 16:00.
Haingura okwa popi kutya inaya mona omaimbo gasha mEtitatu.
Okwa popi kutya aalongi natango oyali momikweyo konima yo ontundi onti-18:00 na oyali taya ningi omalongekidho ngele naya pitikwe ya hogolole.
Omukundu gumwe iinano iile yoondjila mbyoka aanambelewa youniona ya hingi opo ya ka kwatele komeho omahogololo omanga oshitopolwa kehe sha pewa owala omasiku gaali gokuhogolola, sha hala okutya aanambelewa oya kala owala pehala uule woowili mbali omanga inaya tsikile komahala omakwawo.
Esiku lyahugunina lyomahogololo omasiku 15 Septemba okuza potundi onti- 13:00 sigo 18:00.
Haingura okwa popi kutya iizemo yopetameko itayi tseyithwa niizemo ayihe otayi ka tseyithwa owala momasiku 16 gaSepetemba omanga iizemo yopashigwana tayi ka tseyithwa momasiku 19 Sepetemba.
Aalongi otaya pula ya gwedhele noopresnda 8 omanga epangelo lya gandja oopresenda 5.
ELLANIE SMIT