AakwaSwapo ya hala omalunduluko

AakwaSwapo ya hala omalunduluko

Iilyo yOngundu yoSWAPO oya ningi ehololomadhilaadho mOmbaye mEtitano.
Konyala iilyo ya thika po-20 oya ningi ehololomadhilaadho pombelewa yongundu moKuisebmond tayi pula ekutho miilonga lya Paulus Kauhondamwa (omukwatakanithi gwoshitayi), Risto Nambombola (omukwatakanithi), Hilma Shilongo (omukwatakanithi gwelelo lyaakiintu moshikandjo) na Ndapewa Johannes (Oshilyo shOkomitye yOmauyelele) okupitila momikandanyenyeto dhopaali. Oya popi kutya aanambelewa mboka itaya longo we muuwanawa wongundu na otaya longo owala mokwiipa omauwanawa.
Phillip Muneguni, oshilyo shelelo lyoSwapo mOshitopolwa shErongo, okwa taambako omanyenyeto ngoka ga nuninwa Theresia Garises, Fillipus Heita naAsser Kapere taga pula ekutho miilonga lyaanambelewa mboka ya tumbulwa.
Kauhondamwa naNambombola otaku popiwa aniwa kutya itaya vulu okulela na otaya kutha omatokolo ngoka kage li muuwanawa wongundu.
Shikongo naJohannes otaku popiwa kutya otaya fala mekano elelo lyaakiintu mongundu nokuhwahwameka uukwamuhoko.
“Aaleli yetu yamwe oye na opoosa dhi vulithe puyimwe. Otwa kala uule noomvula twa hala hala okukandula po omaupyakadhi pakatu yopashikandjo ihe omaindilo getu itaga talika. Otwa yakula ombaapila omasiku ga piti kutya iikumungu ayihe moshikandjo otayi kalekwa manga.
Oshitayi shaMudhiguGwangolo osha kalekwa niilyo mbyoka yali tayi kutwa oya kalekwa manga.”
Sho a ningilwa omapulaapulo, mayola gwaMbaye, Immanuel Wilfred okwa koleke kutya oha longo onga omudhiginini gwiiniwe pashikandjo, niilyo yilwe ine mbyoka ya tumbulwa oyi na ooposa melelo lyongundu.

OTIS FINCK