Aalongiskola oya hala egwedhelo noopresenda 8Nonando epangelo olya indile aalongiskola ya zimine omagwedhelo ngoka lya tula po nokuhulithapo omananathano ge na sha nomagwedhelo goondjambi, aalongi ohela oya hogolola ngele otayi yi mekanka nenge otaya zimine omagwedhelo ngoka ya pewa kepangelo. Omahogololo otaga utha ngele otaku yiwa mekanka nenge ahowe Aalongi otaya ka ninga omahogololo sha landula sho epangelo lya tokola okuya gwedhela noopresenda 5 omanga yo taya pula oopresenda 8.Ngoloneya gwOshitopolwa shaShana mOmaandaha okwa popitha aalongiskola pokapale kEmanguluko mOshakati, moka a lesha omukanda ngoka gwa shangwa kOminista yElongo, Katrina Hanse-Himarwa.
Konima sho ya pulakene oshipopiwa shoka, aalongi oya li ya pewa ompito ya pule omapulo.
Oya holola omaiyuvo gawo kombinga yomagwedhelo noopreenda 5, na oya pula ngoloneya ngele oku na oonkondo okupopya nayo unene kombinga yiikumungu yoondjambi dhawo.
“Tse katu shi aanapolotika ihe aaniilonga yepangelo. Nomomukanda gwoye gwiilonga omu na kutya oongoloneya naya kundathane oondjambi dhaaniilonga yepangelo?’” omulongiskola a pula Clemens Kashuupulwa. Ngoloneya okwa yamukula kutya ekotampango olye mu pa oonkondo a popye naakwashigwana kutya aaniilonga yepangelo nenge kaye shi aaniilonga.
Aalongi oya popi kutya oya uva nayi molwaashoka minister okwa yeleke oondjambi dhawo noondjambi dhaalongi moSouth Afrika naBotswana.
Omulongiskola gumwe, Katombera Nikolaus, okwa popi kutya kashi li pauyuuki okuyeleka owala ondjambi dhaalongiskola, ihe okwa li tashi kala pauyuuki ngele oondjambi tadhi yelekwa okuza paanambelewa yopombanda mepangelo okuya nawa kaalongiskola.
Omupevi omukomeho gwoonzo dhopauntu mUuministeli wElongo, mOshitopolwa shaShana,
Aune Mundjanima, okwa lombwele aalongi ya kale notseyo yoshizemo shomaihumbato gawo.
“Ekanka otali vulu okweeta omikundu miilonga; ngashiingeyi ethimbo lyomakonaakono na otashi vulu okuguma noonkondo aanaskola,” ombaapila yaminista ya popi.
Lwopokati mpoka ngoka ta longo pehala lyamushanga gwoTeachers Union of Namibia (TUN), Matthew Haakuria, okwa popi kutya aalongi oya pyakudhukwa okuhogolola ngele otaya yi mekanka nenge otaya zimine omagwedhelo ngoka ga tulwa po.
“Katu na we shoka tatu vulu okukundathana, nepangelo otali ka tseyithilwa.”
KENYA KAMBOWE & JEMIMA BEUKES