Manwu a hala omalunduluko mompango yAaniilonga Ehangano lyoMetal and Allied Workers Union olya popi kutya olya hala omahangano ngoka taga yi pondje oompango tadhi ithanwa occupational safety and health (OSH) pomahala giilonga opo kaga pewe we ootendela.Shika oshi li oshitsa shoka sha kundathanwa pethimbo lyomutumba gwopashigwana gwoManwu ngoka gwa ningwa pokati komasiku 24 no 27 gaAguste nuumvo.
Pahapu dhoManwu, omutumba ngoka ogwa nongele kutya ope na omalunduluko ngoka ga pumbwa okuningwa mekotampango lyaaniilonga opo ku gamenenwepo uuthemba waaniilonga. Oya popi kutya ekalekepo lyegameno lyaaniilonga pomahala giilonga nasho osha pumbwa okutulwa mOmpango yAaniilonga.
Ouniona oya popi woo kutya ondjambi yopetameko yooN$20 mowili oya pumbwa okutulwa miilonga moshilongo.
Okwa kundathanwa opo komufala gwaaniilonga avule okukala ta tompola mbala iipotha yaaniilonga, opo aaniilonga kaya kale momikundu.
Omutumba ngoka ogwa tokola opo aakalelipo yaaniilonga pomahala giilonga yamone omadheulo gakwatelamo opolotika oshowo ondjokonona yehangano, opo ya vule okukadheula aaniilonga.
Omutumba ogwa popi woo kutya aaniilonga oya teka omukumo miitayi ya yooloka molwaashoka aaniilonga inaya nyanyukilwa omukalo omanyenyeto gawo haga ungaungiwa nayo uuna ye ga fala kaakomeho yehangano miitopolwa.
Omutumba ogwa hogolola, Angula Angula onga omupresidende gwehangano naIngrid April omupevi presidende. Thompson Mate omudhiginini gwiiniwe, Hilly Shamulele omupevi omudhiginini gwiiniwe, Cecilia Kamburu, amushanga gwopashigwana nomupevi gwe, Richard Isaaks.
Justina Jonas-Emvula okwa hogololwa a ninge amushanga-ndjai omanga Enwich Kazonda a hogololwa nokuninga omupevi amushanga-ndjai.
ELLANIE SMIT