Aakwashigwana ya hala ''oharambee''

Aakwashigwana ya hala ''oharambee''Konyala aakalimo ya thika pe-150 yomolukanda lyaKahandja Park oya tokola okwiikuthila evi taya popi kutya oya loloka okutegelela “oHarambee”. Epangelo otali ende kashona mokugandja evi kaakwashigwana Ondungethaneko yoHarambee Prosperity Plan oyi li oshiyetwapo shOmupresidende Hage Geingob ngoka a yi koshipundi muMaalitsa gwomvula ya piti, na okwa tula miilonga omundengethaneko ndjoka ya nuninwa okweendelelitha omayambulepo oshowo okuyambulapo onkalo yegandjo lyevi kaakwashigwana, okutumbulapo owala yimwepo.
Ongundu ndjoka yaakwashigwana oyiikuthile evi nokulitopola ko noopala, na oya popi kutya otaya kiikuthile evi uuna epangelo lya ndopa okufala ‘oharambee’ kuyo.
Nonando oya kala ya talika kopolisi yoshilando shaVenduka, aakwashigwana mboka oya popi kutya itaya inyenge sigo epangelo lya tameke okutula miilonga omauvaneko giifundja ngoka ya pewa pethimbo lyomahogololo omvula ya piti.


Kwiikwatelelwa koohapu dhomukalelipo gwongundu ndjoka, Mbenda Immaneul okwa popi kutya oya loloka ohiila na itaya tegelele we epangelo.
“Katu na olusheno nomeya. Ohatu ende iinano iile tatu ka konga omeya. Katu na uundjugo naaakiintu momudhingoloko gwetu oye li moshiponga uuna taya yi kiihwa mbyoka hatu longitha onga uundjugo,” Immaneul ta ti.


Okwa popi kutya moombashu dhoka haya zi odha tulwa mumwe unene nuuna kwa holoka iiponga yomindilo omahala gawo agehe ngoka ga kwatathana ohaga pipo.
“Otatu ningi ngaaka opo tu ya ulukile kutya otwa pumbwa shili evi. Oharambee ndjoka taya popi otwa hala ye yi ete kutse huka, ngele aakengeli oye ya nena otaye yi pewa ihe aathigona aluhe otatu lombwelwa tu tegelele.”
Manuel Crespo naye okwa pula evi ta popi kutya ompumbwe ye andjakano lya manguluka mokati kayo oyo tayi etitha ya kwatwe koTuberculosis (TB).
omayamukulo
Mayola gwaVenduka, Muesee Kazapua okwa popi kutya okwa etela ohenda aantu mboka haya zi komalukanda.
“Itandi ti kutya inaya taalela omaupyakadhi ihe otwa tameka nale nokukandulaapo ompumbwe yevi pakutula miilonga omassive urban land servicing ndjoka ya tulwa miilonga momudhingoloko gwaGoreangab,” Kazapua ta ti.
Nonando ongaaka okwa tothamo kutya epangelo kali na oonzo dha gwana, onkene oshilando ngashiingeyi otashi tala kutya otashi wapaleke ngiini evi ndyoka tali pewa aakwashigwana.
JEMIMA BEUKES