Namvet ta kongo eyambidhidho monooli

Namvet ta kongo eyambidhidho monooliIilyo yoNamvet yahala uukwashilyo woonakulwa aakulu Omunashipundi gwehangano lyoNamibia War Veterans Trust (Namvet), okwa pula iilyo nale yoSWATF/Koevoet mbyoka yi li monooli yoshilongo opo yi ye polweela nokuyambidhidha iilyo nale yehangano ndyoka, mbyoka ya unga oontanda mOvenduka. Sho a ningi omutumba naatoolinkundana mOshakati, Jabulani Ndeunyema okwa popi kutya iilyo nale yoSWATF/Koevoet, unene mbyoka hayi popi elaka lyOshiwambo itayi gandja eyambidhidho kuyakwawo.

Okwa popi kutya onkalo ndjoka oye mu thiminike opo akwatele komeho aakwashigwana yomuhoko gumwe mboka taya kondjo opo yamone omauwanawa ngoka taga ka kwatelemo iilyo ayihe nale yoSWATF/Koevoet.

“Ondi na omapulo momutima gwandje kutya omolwashike iilyo nale yoSWATF/Koevoet, aapopi yelaka lyOshiwambo, kaye li oshitopolwa shongundu ndjoka ya unga oontanda mOvenduka, omolwashike inaya kutha ombinga momunyanyo ngoka twa ningi? Ihaye tu pe woo omakwatho gopaukumwe nenge paiyemo,” Ndeunyema a pula.

“Sho iilyo oyindji mbyoka ya unga oontanda yi li yomuhoko gwAaHimba nAaHerero ohandi pulwa kutya Aawambo yakwetu oyeli peni.?

Okwa tsikile kutya ohaya pewa omakwatho kiilyo yoSwapo, mbyoka kayi shi aapopi yelaka lyOshiwambo oshowo aaleli yoongundu dhilwe dhopolotika.

Ndeunyema okwa popi kutya okwa ninga oomvula mbali ina enda mo monooli yoshilongo naashoka otashi ulike eutulemo lye okukondjitha opo iilyo yoSWATF/Koevoet yi pewe uukwashilyo woonakulwa aakulu.

Okwa lombwele aatoolinkundathana kutya okwa ningi omutumba niilyo wawo mehulilo shiwike, mbyoka yi li monooli opo e ya tseyithile kutya oshike tashi ningwa mOvenduka.



Okwa tsikile kutya omolwa ompumbwe yomauyelele, otaya pangele okuhogolola elelo miitopolwa.

Ndeunyema okwa tsikile kutya iilyo yimwe nale yoSWATF/Koevoet oya futwa oombumbo na oya ningilwa omatilitho ngele oya tsikile nokumu yambidhidha.

Omvula ya piti, omupresidende Hage Geingob pamwe noongundu oshona yoominista oya ningi omutumba niilyo nale yoSWATF/Koevoet, omutumba konyala guule woowili mbali, ngoka gwa kundathana onkalo yiilyo mbyoka.

Pethimbo lyomutumba ngoka, iilyo oya pula opo yi pewe ehungomwenyo nepango omolwa omaehamo ngoka ya mono pethimbo lyomalugodhi giita.

Oya pula woo omauwanawa guunamiti, iifuta yopenzela, oompito dhomailongo oshowo omadheulo.

Aakwiita nale mboka oya popi kutya otaya ka konga omayele okuza komahangano gopashigwana ngaashi United Nations nenge International Court of Justice ngele omakemo gawo itaga talika. Mboka oya popi kutya oshimaliwa shoka ya li yamono pethimbo oshilongo sha manguluka inashi gwana. Namvet ota popi kutya okwa kalela po iilyo yili 3 885 mbyoka tayi lumbu nomaulema ga yooloka, omanga iilyo yi vulithe po-10 000 tayi lumbu moluhepo.

Ndeunyema okwa koleke eningo lyomutumba nomuleli gwoshilongo na okwa popi kutya omutumba ngoka ogwo gwa etitha ekaleko lyomahololomadhilaadhilo momapandaanda.

“Owu wete kutya konima nkene twa ningi omutumba nomupresidende Hage Geingob ngoka e tu lombwele kutya tse uunona we na otwa pumbwa okutegelela otwa hulitha po e ningo lyomahololomadhilaadhilo molwaashoka inatu hala okupiyaganeka elelo lyaGeingob.”

Nonando ongaaka Ndeunyema okwa popi kutya nonando oya zimine okutegelela ope na ethimbo ndyoka taya ka loloka okutegelela.



Okwa popi kutya oya ningwa nayo ekwatathano kongundu yimwe po moSADC ndjoka yahala opo ya ninge ongundu yuukulo.

KENYA KAMBOWE