Egandjo lyevi otali ende kashona

Egandjo lyevi otali ende kashonaOkwa pumbwa okutulwa miilonga omukalo gokweendelelitha egandjo lyevi Aanangeshefa mongeshefa yetungo lyomagumbo oya popi kutya omukalo ngoka tagu longithwa komalelo goondoolopa metungo lyomagumbo, ogo tagu pelwa ombedhi ekateko lyegandjo lyevi nokukandulapo ompumbwe yomagumbo moshilongo. Omunangeshefa mongeshefa yelanditho netungo lyomagumbo, Erastus Nikodemus okwa popi kutya omukalo gwoompangela dhoondoolopa odho tadhi shunitha pevi egandjo lyomavi netungo lyomagumbo moondoolopa.

Nikodemus okwa popi kutya onkalo ndjoka otayi uvitha nayi aalandithi yomagumbo oshowo aalandi yomagumbo.

Okwa tsikile kutya onkalo ndjoka otayi londitha pombanda iitungithi yomagumbo nomayakulo naashoka otashi etitha woo e yo pombanda lyondando yomagumbo.

Nikodemus okwa popi kutya okwa pumbwa okutulwa miilonga omulandu ngoka tagu endelelitha egandjo lyevi oshowo etungo lyomagumbo, nokukandula po ompumbwe yomagumbo mokati koshigwana. Nikodemus okwa popi ngaaka pethimbo kwa patululwa pambelelwa Oamuliko gwIipindi mEenhana, mOshitopolwa shaHangwena.

Okwa popi kutya onga oonkambadhala dhokutsakaneka epangelo ondjilakati mokukandula po ompumbwe yomagumbo, ehangano lye otali ka ninga po oompangela yuulethimbo yekandulepo lyompumbwe yomagumbo.

“Muule woomvula ntano dhili komeho, otwa hala okutula miilonga omilandu dhiitungithi oshowo egandjo lyiiyemo yokutungitha kaakwashigwana mboka haya mono iiyemo yili pevi. Okupitila momilandu ndhoka nena otatu ka tulapo esimaneko lyuuntu wAaNamibia, momukalo gwogandja omagumbo kaaNamibia.”

Okwa tsikile kutya opo kwaadhike omalalakano ngoka, oya pumbwa okukondopeka ekwatathano lyawo nepangelo oshowo aakuthimbinga yalwe ayehe nokukalekapo oshili, nuuyuuki miilonga yawo.

Nikodemus okwa pula woo oombaanga dhi konge omukalo gwokugandja omikuli dhomagumbo, komagumbo ngoka ga tungwa niitungitho yimwe po, kakele owala koondhopi noosamende.

Okwa pula woo omalelo goondoolopa ga gandje evi kaatungi kondando yi li pevi nokupitila mekwatathano ndyoka, nena otaku vulu okushunithwa pevi ompumbwe yomagumbo nevi moshilongo.

Omupeha prima, Netumbo Nandi-Ndiatwah okwa pandula Nikodemus omolwa eyambidhidho dhe meyambulepo lyondoolopa yEenhana.

“Onda tseyithiwa kutya Nikodemus okuli omupunguli omunene mEenhana. Shoka sha simana molwaashoka kutya okuli omupunguli mushimwe shomiikondo ine ya nuninwa omayambulepo mbyoka ya totwamo kepangelo sho oshilongo shamanguluka. Otandi popi kombinga yoshikondo shomagumbo shoka shi li omukundu gwa taalela oshilongo. Nikodemus iilonga yoye mokukwashilipaleka onkalonawa yaantu yetu otashi holola ombepo yoHarambee.” Ehangano lyaNikodemus olya mono evi okupitila moprogramma yopublic-private partnership nelelo lyondoolopa yEenhana.

Monena Nikodemus Holdings otayi tungu omagumbo geli 600 gaantu mboka haya mono iiyemo yi li pevi mOmhito extension 2 no 3.



KENYA KAMBOWE