Aailongi yaUnam ya loloka okutegelela

Aailongi yaUnam ya loloka okutegelela Aailongi oye wete inaya simanekwa kelelo lyoshiputudhilo shawo Aailongi mOshiputudhilo shoUniversiti yaNamibia mOshakati, oya popi kutya oya vulwa okutegelela elelo lyoshiputudhilo shika opo li kandulepo omukundu gwomuhandjo. Onkalo itayi vulu okwiidhidhimikilwa no ya nika oshiponga oyo yimwe yomiitya ya longithwa kaailongi mboka taya thitha omahala ga yooloka popepi noshiputudhilo shaUnam mOshakati.

Shoka osha landula etalelepo lya ningwa komutoolinkundana nguka, pomahala gamwe po mpoka hapu zi aailongi mboka, taya thiminikwa konkalo opo ya thithe mpoka tayazi omolwa ompumbwe yomuhandjo moshiputudhilo.

Aailongi oya kala uule woomvula odhindji taya pula elelo opo li ya tungile omuhandjo, nomwedhi Kotomba omvula ya piti, aailongi oyali ya ningi ehololomadhilaadhilo, na oya ningi omatilitho kutya otaya ka dhengela oombashu meni lyoshiputudhilo.

Omolwa uupyakadhi wopashimaliwa, aailongi mbaka otaya thiminikwa konkalo opo ya thithe nduno oombashu omanga yamwe taya thitha momagumbo geli monkalo ya nayipala noonkondo, moka oongodhi dhomalusheno inadhi tulwa mo nawa oshowo omakuma ga kulupa.

Yamwe mboka itaya vulu okufuta iifuta yokomwedhi ohaya kala pamwe naakwanezimo yawo mOshakati nenge mOngwediva nomahala ngoka ogeli kokule noshiputudhilo.

Aailongi oya lombwele oNamibia Sun kutya ohaya ende iinano iile molwaashoka iifuta yotaxi oyi li ishewe uupyakadhi.

Nonando aailongi mbaka oye na omahala gokuza, olusheno olu li ishewe omukundu gumwe ya taalela. Yamwe oya popi kutya ohaya thitha pomahala mpoka kaape na olusheno, na ohaya thiminikwa konkalo ndjoka opo ya kale kongulumambo yoshiputudhilo taya lesha sigo oowili dhuusiku, na otaya ningi iihakanwa yoongangala mondjila dhawo dhokuya komagumbo, ndhoka tadhi ya yeke iinima yawo ngaashi oongodhi dhopeke noolaptop.

Pehala limwe mpoka hapu zi aailongi ya thika pomulongo, oya thiminikwa konkalo opo yiiyogele moshiyaha sha tentekwa kombanda yoshipakete shoombiila, mokandjugo, naashika otashi holola kutya uuna pe na gumwe tiiyogo nena yakwaawo itaya vulu okulongitha okandjugo.

Kakele kompumbwe yehala noshotuu, aailongi otaya lumbu mokati kezimba ewinayi ndyoka hali zi mokandjugo hoka, na oyiigilika ngashiingeyi molwaashoka otaya popi kutya oyo onkalo ya kala muyo uule woomvula ngashiingeyi.

“Inatu nyanyukwa. Unam ina hala oku tu tungila omuhandjo, otaye tu lombwele kutya oyiipyakidhila nokutula miilonga eindilo lyetu ndyoka ihe osho ya kala nokutulombwela uule woomvula ndatu dha piti monena. Inatu hala owala omauvaaneko ihe otwa hala okumona iilonga tayi longwa,” omwiilongi gumwe a popi.

Aailongi oya gandja omukandanyenyeto gwawo omvula ya ziko, pethimbo ya ningi ehololomadhilaadhilo, na oya li ya pe elelo lyoshiputudhilo shawo sigo omasiku 28 gaFebruali opo li kale lya yamukula, na oyali ya ningi omatilitho kutya otaya ka dhika oombashu meni lyolugumbo lwoshiputudhilo shoka.

Pahapu dhomupeha presidende gwoStudent Representative Council (SRC) Junia Shilunga okwa popi kutya omukandanyenyeto gwawo ngoka inagu mona eyamukulo okuza kelelo lyoshiputudhilo.

“Katu na esiku kutya otatu shi ningi uunake ihe otatu ke shi ninga mbala.”

Shilunga okwa popi kutya aailongi moshiputudhilo sho mOshakati kaya uvite ombili molwaashoka otaya thiminikwa yiilongele monkalo ondhigu.

“Oto vulu okweenda to pula aailongi, kape na ngoka te ku lombwele kutya okwa nyanyukilwa onkalo ndjika, naashika osho sha etitha tu kale twa pyakudhukwa okudhengela oombashu dhetu meni lyoshiputudhilo. Pamukalo ngoka otatu ka yanda iifuta yoohiila/yokuthitha yili pombanda oshowo otatu ka kala megameno.”

Shilunga okwa popi kutya oye wete kutya elelo lyoshiputudhilo inali kuthako uupyakadhi waailongi onga onkalo yopaulumomhumbwe.

“Andola okwali elelo lyoshiputudhilo li na natse andola olya kaleka etungo lyomweelo gwoshiputudhilo oshinene mOvenduka ndyoka lya pula oshimaliwa shoomiliyona 27. Iinima yimwe mbyoka oyo tayi etitha omaipulo mutse okwiipula kutya tse otwa simanekwa ngaa kaaleli yetu?.”

KENYA KAMBOWE