LPM iikanyuna omalundilo gompinge noshigongi shaGeingob

LPM iikanyuna omalundilo gompinge noshigongi shaGeingob Ongundu yoLandless People’s Movement (LPM) oya ekelehi omapopyo ngoka ga ningwa kutya otayi lombwele aantu moKaiti opo kaaya kaye poshigongi shoSwapo, shoka kwa tegelelwa shi ka ningwe kOmupresidende Hage Geingob mehuliloshiwike ndika.

Oshikundaneki shoNew Era osha lopota mOmaandaha kutya omukwatakanithi gwongundu yoSwapo, moshitopolwa sha //Karas, Mathews Mumbala, okwa lundile oLPM kutya otayi lombwele aantu opo kaaya ye koshigongi shoka tashi ka ningwa kuGeingob.

LPM okwa pula Mumbala uulike uumbangi womapopyo ge.

Ongundu ndika oya popi kutya kayi na ohokwe yekuthombinga lyasha miikwapolotika yo ina yi kwatakanithwa noongundu dhoopolotika. Oya popi kutya yo ehangano lyehwahwameko lyuuthemba womuntu na otali pula owala egandjo lyevi lyuuthiga kooyene.

“Onkene otatu tindi nomuthindo oohapu dhaMumbala, molwaashoka ota kambadhala okukwatakanitha LPM nongundu yopolotika. Otu wete kutya Mumbala ota kongo esimano lyopapolotika paku ponokela LPM,” LPM a popi ngaaka momukanda ngoka a pititha.

LPM okwa popi kutya Mumbala okwa kambadhala okuya moshipala oshigongi shawo shaakwashigwana shoka ya ningile mokapale ka J Stephanus omwedhi gwa piti, sho a ningi ekwatathano nelelo lyondoolopa opo kali pitike ehwahwameko ndyoka li ningile oshigongi shawo mokapale hoka.

Oya popi kutya Mumbala okwa li a hala okuningila oshigongi she shoSwapo, mehala ndyoka esiku olyo tuundyoka, na oya popi kutya Mumbala ke na euveko lya sha kombinga yepulo lyoshikumungu shevi.

“Epulo lyevi oshinima oshinene okuyeleka nomupresidende kehe oshowo ongundu yopolotika kehe. Omadhipago gakiinahenda ngoka ga ningilwa AaNamibiaa pandjokonona oga ningwa opo ku kuthweko evi lyawo. Ekuthoko lyevi ndyoka olya etitha omaupyakadhi gopaliko, pankalathano nopamuthigululwakalo mokati kaantu yetu, omaupyakadhi ngoka tuli mugo sigo okesiku lyonena.”

Ehwahwameko ndyoka olya popi kutya kali na omalakano gasha kombinga ye yo moshipala oshigongi shoSwapo nonando mboka oye wete kutya inaya simanekwa na otaya tukwa kaaleli yopashigwana unene kelelo lyaSwapo.

CATHERINE SASMAN