Iiningwanima melelo lyaShakati tayi tsikile

Iiningwanima melelo lyaShakati tayi tsikile Omupevi mayola gwondoolopa yaShakaati Ndamonongheda Namunyela oshowo omushipundi gwelelo lyondoolopa ndjoka, Gabriel Kamwanka, oya kala taya kwatelele omitumba dhevi shaaheli paveta.

Mboka yali oya dhigipo okomitiye ndjoka ihe kape na ngoka eshi shi melelo ndyoka kutya osha ningwa uunake, na osha ningwa ngiini.

Kamwanka okwa kala omunashipundi gwokomitiye ndjoka okutameka mo-2011 pamwe nomupeha omunaashipundi Hamunyela.

Sha landula oolopota dhuulingilingi dhoka dha lopotwa koshifokundaneki shika, elelo lyondoolopa ndjoka olya ningi omutumba oshiwike sha piti, moka lya tseyitha kutya Kamwanka keshi we oshitopolwa shokomitye yevi.

Okomitiye ndjoka ohayi gandja nomayele kombinga yiikumungu yevi kelelo lyondoolopa. Omauyelele ga gandjwa kelelo lyondoolopa otaga holola kutya okomitiye ndjoka ohayi tala omaindilo gevi ngoka ga ningwa nokugandja omagwedhelepo kelelo lyondoolopa kombinga yegandjo yomavi.

Ombaapila ndjoka ya monika koshifokundneki shoNamibian Sun oya tuminwa Omunambelewa Omukuluntu gwelelo lyondoolopaa yaShakati, Werner Iita okuza kuAmushanga mUuministeli wEyambulepo lyOondoolopa nIitopolwa Nhgidinua Daniel, muNovemba, ta pula opo mboka yaali yiikuthe miilonga onga oshitpolwa sho komitiye ndjoka.

Oonzo melelo ndyoka oya popi kutya mboka oya tindi okuza miilonga onga iilyo yokomitiye ndjoka opo yagamenenepo uuwananwa wawo.

“Konima yoshikumungu shomatala, okomitiye ndjoka oya tameke tayi kundathana omaindilo gomavi ngoka ga ningwa kuKamwanka naNgoloneya gwaShana, Clemens Kashuupulwa. Okwa zi miilonga ihe pethimbo ndyoka omonamati gwamupeha mayola ngoka eli menindjela gwiiyemo melelo ndyoka Damian Hamunyela okwa pewa evi,” onzo ya popi.

Iilyo mbyoka ohayi ulikwa kelelo lyondoolopa ihe shoka otashi ulike kutya Kamwanka naHamunyela oyiiulike yoyene. Iilyo yilwe mokomitiye ndjoka, Iita, omupeha menindjela gomayakulo gopautekinika, Lucas Amushembe, Omunambelewa gomayambulepo gondoolopa, Tunomukwathi Muma, Omunambelewa omukuluntu gwiiyemo Emily Alweendo, omunambelewa omukuluntu gwoonzo dhopauntu, Erastus Anguku, Asser Iita naLembi Iipinge onga amushanga.

Pethimbo lyomutumba ngoka gwa ningwa elelo olya tseyithaa iilyo iipe mbyoka tayi longo sigo omo-2019. Okomitiye ompe otayi kwatelwa komeho kuIita nomupeha gweMartha Kaulwa a za koShack Dwellers Federation.

Iilyo yilwe oSofia Henock a za koShack Dwellers Federation, Omunambelewa gwomaliko Kanisius Gideon, Muma, Omunambelewa gwuundjolowele Kornelius Kapolo, Alweendo, Amushembe oshowo omukwashigwana Lisias David.

Kamwanka okwa tindi okutya sha. Kuyele okwa li a lombwele oshifokundaneki shika kutya okwa hogololwa opo a kwatele komeho okomitiye ndjoka.

Omunambelewa gwomauyelele melelo ndyoka, Katarina Kamari, oshowo ngoka ta longo pehala lyomunambelewa omukuluntu, Kornelius Kapolo, oya popi kutya kaye na uuyelele moshikumungu shoka.



ILENI NANDJATO