Iimbuluma yaSwapo tayi konaakonwa

Iimbuluma yaSwapo tayi konaakonwa Miimbuluma moka omwa kwatelwa omadhipago nekano lyaakwashigwana Okwa pitithwa omadhina gAaNamibia mboka ya zimine opo ya ninge oshitopolwa shokomisi ndjoka tayi ka ninga omakonaakono omolwa iimbuluma yuuthemba waantu mbyoka taku popiwa ya longwa kuSwapo. Okomitiye tayi ithanwa Committee of Parents and the Truth and Justice Committee oya tseyitha omadhina gaamboka ya tokola okuninga omakonaakono giimbuluma mbyoka ya longwa kuSwapo, pethimbo lyekondjelomanguluko.

Iimbuluma mbyoka oya longwa pokati ko-1966 sigo 1989, niilyo yokomitiye ndjoka oya tumbulwa kutya oDr John Nakuta, Leah Shaanika, Hendrik Christian, Monika von Wietersheim naPaul Thomas.

Paul Threwela a za koUnited Kingdom, na okwa li nale onkwatwa ya Robben Island noshilyo shoUmkhonto we Size, oshitopolwa sho African National Congress (ANC) pethimbo lyekondjelomanguluko okwa zimine opo a kwathele momakonaakono ngoka pandondo yopashigwana.

Erica Beukes, ngoka eli omunashipundi gwokomitiye okwa popi kutya omadhina giilyo yokomitiye ndjoka gaamboka ya za pondje yoshilongo otaga ka tseyithwa mbala.

Omadhina ngoka otaga kapewa Hahende-Ndjai gwepageo, Sackey Shanghala, ngoka a pewa oshinakugwanithwa shokulonga nokomitiye ndjoka, pehala lyepangelo lyaNamibia.

Beukes okwa popi kutya omadhina ngoka otaga ka gandjwa koUnited Nations Committee Against Torture (CAT), oongeleka dhopaigwana oshowo aakuthimbinga ayehe moshikumungu shoka.

Okomitiye ndjoka oya hala ookomufala mboka ya ninge omakonaaono momadhipago nekwatepo lyoonkwatwa dhaazaizai AaNamibia, omamonitho giihuna oshowo iimbuluma ayihe mbyoka tayi pelwa ombedhi elelo lyaSwapo taku popiwa kutya oya longwa kewawa lyaanyasha yongundu ndjoka mo-1976 oshowo kiilyo yoPLAN.

Ongundu ndjoka oya popi kutya eningo lyomakonaakono olya pumbiwa molwaaashoka, Swapo sigo onena okwa tindi okugandja omatompelo omolwa omadhipago ngoka nekano lyaakwashigwana.

CATHERINE SASMAN