Epangelo lya hala okulanda iipambuliko moMTC

Epangelo lya hala okulanda iipambuliko moMTC Epangelo olya hala okulanda po oopresenda 34 dhiipambuluko yaMTC mbyoka ngashiingeyi yi li momake gehangano lyaPortugal Telecom.

Shoka osha hololwa kOminista yOmauyelele nOmakwatathano goPautekinika, Tjekero Tweya. Iifuta yiipambuliko yepangelo okuza kuMTC nayo okwa tegelelwa yi ka londe pombanda uuna etsokumwe ndyoka lya tulwa miilonga molwaashoka iimaliwa itayi ka kala we tayi thigi po oshilongo.

Omukanda gwiikundaneki ngoka gwa pitithwa kominista yomauyelele ogwa holola kutya ehangano lyoGovernment Institutions Pension Fund, olyo tali ka kwatela komeho elandeko lyiipambuliko mbyoka.

Tweya okwa popi kutya epangelo olya tokola pankatu yokabinete opo li landeko iipambuluko mbyoka ya kalela po oopresenda 34 yehangano lyoMobile Telecommunications Network (MTC).

Okabinete oka tokola opo ehangano lyoNamibia Post and Telecommunications Holdings (NPTH) opo li mone uuthemba okuza ko SAMBA nokukatuka onkatu pehala lyoAfricatel B.V., omanga inaku manithwa etsokumwe ndyoka. Okabinete oka zimine opo NPTH naMTC ya kwatele komeho oonkundathana dhiilonga yaMTC dhomonakuyiwa.

Tweya okwa tsikile woo kutya NPTH okwa pewa oshinakugwanithwa a kwatele komeho omulandu gwokulanda ko iipambuliko mbyoka.



Ominista yEmona, Calle Schlettwein okwa popi kombinga yelandeko lyiipambuliko mbyoka na okwa ekelehi omapopyo kutya GIPF oye ngashiingeyi aningwa oshiputudhilo shokukandulapo oompumbwe dhiimaliwa yepangelo.

Ehangano lyomakwatathano lyaBrazil muJuni gwo-2016 olya koleke kutya Samba Luxco S.a.r.l., okupitila mukuume ke mongeshefa Africatel B.V. (Africatel), oya tokola opo ya shunithe pevi iipambuluko yawo moAfricatel okuza poopresena 25 okuya 14, nokuyambulapo iipambuliko ye mongeshefa yomahooli okuya poopresenda 86.

Momukanda gwolopota yopashimaliwa ngoka gwa pitithwa kuMTC okwa holola kutya okwa mona eyopombanda lyiiyemo noopresendaa 8 okuya pehulilo lyomwedhi Sepetemba gwo-2015. MTC okwa tseyitha egwo pevi lyiiyemo konima yiifuta yiishoshela yepangelo okuza poomiliyona 504 mo-2014 okuya poomiliyona 491 mo-2015.

OGONE TLHAGE