Ondjala otayi hepeke oshigwana

Ondjala otayi hepeke oshigwana Aanona yaali kehe momweedhi ohaya pangwa omanyutu moshipangelo shaKatutura. Uuyelele mboka owa hololwa kOmundohotola Wilon Benjamin pethimbo omuhwahwameki gwointernational child-rights , Graça Machel a talele po oshipangelo shoka oshiwike sha piti.

Pahapu dhaBenjamin, oopresenda 80 dhiipotha mbyoka odha lopotwa mokati kaakalimo yaVenduka, omanga yilwe haya lopotwa okuza kiipangelo yilwe.

Machel pamwe nomukomeho gwoUnicef mOshitopolwa shomUuzilo nUumbugantu waAfrika, Leila Pakkala, oye li moNamibia metalelepo nokukwatela komeho ooprograma dhepangelo dhoka dha nuninwa okukondjitha omanyutu mokati kaanona.

Benjamin okwa popi kutya okwa pumbwa okutulwa miilonga omandiki gomanzulonkalo popepi nuupangelogona molwaashoka aanona mboka ya kwatwa omanyutu oya pumbwa okukala popepi niipangelo.

Omukomeho gwoprogram dhUundjolowele mUuministeli wuundjolowele, Marjorie van Wyk, okwa popi kutya onkalo ndjoka otashi vulika yi ka hwepopale uuna kwa talululwa oprograma yoRevised Food Security and Nutrition Policy and Scale Up Nutrition Country Implementation Plan 2017-2018.

Van Wyk okwa popi woo kutya ompumbwe yaaniilonga ye na uunongo kombinga yonkalo yomanyutu muuministeli oyo tayi etitha woo onkalo yi nayipale.

Ondjele yeyamitho kontulo moNamibia oya thikama poopresenda 48.5. palopota yo2016 Global Hunger Index (GHI), oopresenda 42.3 dhaaNamibia otadhi lumbu nomanyutu pamapekaapeko ga ninga pokati komvula yo-2014 no 2016. Oopresenda 7.1 okwa monika kutya odhaanona yeli kohi yoomvula ntano, okuyeleka noopresenda 10 dhoka dha dhidhilikwa momvula dho-2000.

Olopota oya tsikile kutya omaso mokati kaanona aashona onga oshizemo shondjala oga shuna pevi okuza poopresenda 6.5 okuya poopresenda 1.5.



JEMIMA BEUKES