Ndeitunga a hala omwaalu gwetanga lye gu gwedhe

Ndeitunga a hala omwaalu gwetanga lye gu gwedhe TUYEIMO HAIDULA

OSHAKATI

Omunambelewa Omukomeho gwOpolisi yaNamibia, Ndjai Sebastian Ndeitunga, okwa popi kutya etanga lye olya pumbwa okugwedhwa omolwa ompumbwe yaanambelewa ndjoka tayi etitha uupyakadhi megandjo lyomayakulo.

Ndeitunga okwa popi ngaaka pethimbo kwa ningwa edhimbuluko lyEsiku lyAapolisi ndyoka lya dhimbulukiwa moTsandi moshitopolwa shaMusati.

Okwa popi ngaaka nokweendulula omatumbulo gaKomanda yOpolisi mOshitopolwa shaShana, Rauha Amwele ngoka a popi ngaaka oshiwike sha piti, a holola kutya oshitopolwa osha taalela ompumbwe yaanambelewa yOpolisi.

Okwa popi kutya iilyo yetanga yimwe otayi yi mopenzela, yamwe oya thigipo iilonga, yamwe oya kuthwa miilonga omanga yamwe ya hulitha, na kape na omapingepo ga ningwa.

Ndeitunga okwa popi kutya sho etanga ndyoka lya totwapo momvula yo 1990, omwali mu na aanambelewa yeli po800. Omwaalu ngoka ogwa londo sigo opaanambelewa 18 000 ihe omwaalu ngoka ogwa shuna pevi paanambelewa 14 800.

Ndeitunga okwa popi kutya onkalo ndjoka otayi limbililike molwaashoka iilyo oyindji natango okwa tegelelwa yi ye mopenzela muule woomvula ndatu.

Ndeitunga nenge Amwele inaya holola kutya otaku pumbiwa omwaalu gwaanambelewa yangapi ihe shoka otashi kala oshiwanawa sho Namibia e na omwaalu guli pombanda gwokwaahena iilonga.

Sho a popi poshituthi sha faathana Minista Albert Kawana, okwa popi kutya opolisi oyi na oshinakugwanithwa sha simana shokugamena oomwenyo nomaliko omanga pethimbo lyafaathana taya kwashilipaleke egameno lyoshilongo.

Okwa dhimbulukitha aapolisi kutya oyeli aapiya yoshigwana ethimbo kehe nokusimaneka oshigwana. Okwa pula woo ya hwahwameke uuthemba womuntu nemanguluko.