()/assets/images/3454/uulingilingi-megandjo-lyiilonga-mehangano-lyaswapo-2021-12-210.jpg)
Uulingilingi megandjo lyiilonga mehangano lyaSwapo Aanapolotika yaSwapo taya idhopo miilonga yehangano Ehangano lyongondu yoSwapo, lyedhina Guinas Investments, otali lundilwa lya kengelele megandjo lyopoosa yiilonga yobusiness administrator nokupita pomunkulo omuntu ngoka a mono iitsa yi li pombanda okuza mokakonaakono kiilonga. 
JEMIMA BEUKESOVENDUKA
Oshikumungu shoka tashi tamanekelwa ehangano ndyoka li li mongeshefa yokumina, okutunga, okukwata oohi, oohotela oshowo okunduluka osha lopotwa kOkomisi yoAnti-Corruption Commission (ACC).
Nonando ongaaka ACC okwa tindi okuninga omakonaakono.
Omunambelewa omupopiliko gwoACC, Josephine Nghituwamata okwa lombwele oNamibian Sun kutya oshikumungu shoka osha shangithwa nokakomisi hoka, ihe sho kwa ningwa omakonaakono okwa monika kutya olopota dhoka itadhi vulu okukonaakonwa kohi yOmpango yOkukondjitha iikengelela.
Aakomeho yamwe po mehangano lyoGuinas otaya lundile Swapo kutya otiidhopo miilonga yehangano, nokulongitha onkalo mokumona iitsa mopolotika.
Momasiku gaheyali gaKotomba, Anna Shimbudhi okwa shangele kehangano lyoACC, pataneke omukalo gwegandjo lyiilonga mehangano ndyoka, ta popi kutya kagu li pauyuuki na otaku longithwa pambambo oonkondo dhombelewa kaaningi yokakonaakono kiilonga.
Shimbudhi okwa lundile woo omupeha minista guuthikepamwe, Bernadette Jagger, ngoka e ki amushanga gwiikwaliko mongundu kutya ota piti pomunkulo euliko lyaantu mboka ya gabdjwa kelelo lyehangano.
Aantu yahamano oya ningilwa okakonaakono na omwa kuthwa yatatu mboka ya piti okakonaakono ya tumbulwa kutya oGeorge Ithembu, Queen Kamati oshowo Martha Iidhenga.
Elelo olya popile Ithembu kutya oye a piti nawa okakonaakono hoka na olya gandja omagwedhelepo kutya okwa pumbwa okutalika a pewe opoosa yuumenindjela mboka.
Momasiku 16 gaAguste, omunashipundi gwelelo lyoGuinas, Paulina Haindongo okwa shangele omukanda omukomeho gwiilonga moSwapo, Joseph Kaudinge te mu tseyithile kutya elelo olya gandja omadhina gatatu opo pu kuthwe ngoka ta pewa ompito ndjoka yiilonga. Omadhina ngoka oKamati, Iidhenga oshowo Onesmus Embula.
Pambaapila yaHaindongo, Kamati oye a halika kelelo, ihe mombaapila yomomasiku gatano gaKotomba, Jagger okwa shangele amushanga gwoSwapo, Sophia Shaningwa ta pula Iidhenga oye a pewe ompito ndjoka.
Iilyo yelelo yimwepo oya holola omalimbililo mokuuva kutya Jagger ina tala komagwedhelepo gawo gaangoka ya hogolola na okwa hogolola Iidhenga. Iidhenga omonakadhona gwomunapaliamende gwoSwapo, Fenny Nanyeni. Jagger ina vula okumonika a ningilwe omapulo omanga onkundana ndjika inayi nyanyangithwa
Kamati, ngoka e li kansea melelo lyoshilandopangelo kokatekete koSwapo, okwa koleke kutya okwali oshitopolwa shokakonaakono hoka ka ningwa ihe ina mona omayamukulo gasha kombinga yoshizemo shokakonaakono hoka. Okwa ukitha omapulaapulo kwaamboka taya vulu okugandja omayamukulo.
Haindongo sho a ningilwa omapulo okwa popi kutya itati sha.
Shaningwa na ye ke na ontseyo yonkalo ndjoka ihe okwa gwedhapo kutya ngele aantu taya ningi omaindilo giilonga ihaya ningi omaindilo nomadhina gaavali yawo na ihaku talika kutya nguka okwa valwa kulye. Okwa tsikile kutya mboka ya gwanithapo iipumbiwa naya mone oompito na ke na ohokwe momahokololo goTeam Swapo noTeam Harambee, ta popi kutya ayehe iilyo yoSwapo, taya yambidhidha ookandindate dha yooloka.