Omulumentu a zimine edhipago lyomukadhi Uukodhi owo wa etitha omusamane a dhipage omukulukadhi gwe omulongiskola, mOshitopolwa shaShana muJuni gwomvula ya piti.Shoka osha uvika mOmpangululo yoPombanda yaShakati pethimbo omulumentu ngoka holoka mompangu.
Johannes Shipanga (59) okwa zimine kutya okwa yaha omukulukadhi gwe momukunda Onalulago mOshana momasiku 17 Juni omvula ya piti, omanga ina hwikapo olutu lwe ndoka a fikile mohauto.
Shipanga okwa popi kutya yepamwe nomukulukadhi gwe omunamimvo 51 Justina Shipanga, oya li ya fala ombaapila yaantu puushinda na oya tameke taya nyenyeta popepi negumbo lyawo shoka sha etitha eso.
Aahokanathani mboka oye na aanona yane, ngoka omukuluntu oku na oomvula 26 omanga omushona e na oomvula 18.
Shipanga okwa popi kutya omanga yeli mohauto, okwa pula omukukadhi gwe kutya ota galuka ethimbo peni ihe eyamukulo lye ineli pandula sheetitha opo e mu yahe.
“Onde mu pula kutya ota galukile kegumbo ethimbo peni, ihe okwa yamukulandje kutya kandi na uuthemba wokumu pula ngaaka na itandi kala nuuthemba wokumupula….Omayamukulo ngoka oga etitha ndi longe iilonga mbyoka yasatana, kanda Ii ndi na okuyi longa,” Shipanga ta ti.
Shipanga okwa popi kutya okwa yaha omukulukadhi gwe lwali momutse. Okwa popi kutya sho emuyaha oholo yotango okwa gwile komatundji ge na okwe mu yaha ishewe. Okwa tsikile kutya okwa tomeke ehauto omulilo nolutu lwomukadhi olwa pi italu vulu okudhimbululwa.
“Ondi na ondjo, ondina ondjo koshipala shaKalunga nEpangelo. Kanda li ndi na okuninga shoka nda ningi. Onda tula aanona yandje mehalakano oshowo oofamili adhihe,” Shipanga a lombwele ompangu.
Uukodhi nuupyakadhi wiimaliwa
Shipanga okwa hokolola kutya ondjokana yawo yuule woomvula 26 oya tameke tayi ongotele sho a kanitha iilonga mo-2009 na okwa uvu omifofodholo kutya omukulukadhi gwe okwa tameke ekwatathano lyopahole nomulumentu gwedhina Joseph Iyambo.
Shipanga okwa popi kutya omukulukadhi gwe kali a hala we okutopolwa iiyemo ye naye konima sho a kanitha iilonga, onga omulandithi goopolisi, omanga omukukadhi a li omulongiskola pOlulago Combined School.
“Omukulukadhi gwandje okwa indikindje ndi longithe uukalata wokunana iimaliwa. Okwa hulitha po okuulukilandje okapayslipa ke, nomomasiku moka ha kwata okwe ya megumbo ina landa sha.”
Shipanga okwa popi kutya ina kala iikolelela mondjambi yomukulukadhi gwe ihe okwa popi kutya sho ya dhiki ondjokana yawo mo-1988 ayehe oya tsu kumwe opo ya kale taya topola iiyemo yawo mokupalutha ofamili yawo.
Kombinga yekwatathano lyopahole, Shipanga okwa zimine kutya ke na uumbangi ihe okwa uvu onkundana ndjoka komulongi gwoposkola yaOnguma, mpoka Iyambo ha longo.
Omufali gwiihokolola kompangu , okwa popi kutya nakusa kali a hala okukala mekwatathano naShipanga shiikolelela koonkundathana dhawo dha hugunina omanga ina dhipagwa. Na okwa pula ku gandjwe egeelo lyoomvula 40 sigo 45 modholongo. Omukalelipo gwaShipanga ota pula egeelo lyoomvula 18 konima yekumba, ta popi kutya omuyakulwa gwe okwa ulike kutya okwa longa oshimbuluma oshiwinayi na okwa gandja uuyelele awuhe kopolisi nokuzimina woo ondjo. Okwa pula woo ombili okuza koyana naakwanezimo.
Omupanguli Marlene Commasi okwa undulike oshipotha komasiku 24 gaNovemba. Shipanga ota kala modholongo.
KENYA KAMBOWE