Omakonaakono melongithonayi lyiimaliwa mOmusati ga pu Oomiliyona dhi vulithe po-12 odha longithwa pambambo Omakonaakono gelongithonayi lyiimaliwa ngoka taga ningilwa omunambelelwa omukuluntu gwElelo lyaMusati oshowo omupeha omukomeho gwIiyemo melelo ndyoka Aanambelewa mboka ya li ya kuthwa miilonga, otaya ka pulakena oshizemo shomakonaakono ngoka ga ningwa moshiwike twa taalela. Sha landula ezimino lyekutho lyawo miilonga pakathimbo kOkakomisi kAaniilonga yEpangelo.Omunashipundi gwElelo, Modestus Amutse, okwa lombwele oNamibian Sun kutya sha landula oonkundathana dha ningwa nOkakomisi kAaniilonga yEpangelo, okakomisi hoka oka taambako etokolo lyelelo lyOshitopolwa shoka opo kukuthwe miilonga Omunambelewa Omukuluntu gwOshitopolwa Protasius Andowa, oshowo omupeha omukomeho gwoshikondo shIiyemo, Elizabeth Mutota, opo ku vule okuningwa omakonaakono.
“Ongundu yomakonaaakono oya manitha nale omakonaakono noshizemo shaashoka sha monika po otashi ka gandjwa momutumba gwelelo ngoka tagu ningwa oshiwike twa taalela. Otaku ka tokolwa momutumba ngoka ngele naya tamanekwe nenge ahowe. Monena inaya tulilwamo natango iipotha.”
Amutse inaya muule kutya omolwashike aanambelewa mboka yaali ya kuthwa miilonga pakathimbo ihe okwa popi owala kutya oshi na ekwatathano nelongitho nayi lyiimaliwa yelelo okutameka mo-2012.
“Otwa pula uuministeli wetu wu tukwathele aanambelewa yomakonaakono. Oye tu tumine aanambelewa taya kwatelwa komeho komuyalulimambo omukuluntu mUuministeli wOmayambulepo gOondoolopa nIitopolwa,” Amutse ta ti.
Namibian Sun oku na uuyelele kutya oshe ya polweela kutya Andowa naMutota oya longitha pambambo iimaliwa sho ya ndopa okuyelitha kutya imaliwa ya thika poomiliyona 12.3 oya longithwa ngiini.
Pauyelele wa gandjwa konzo, mboka yaali oya gandja uuyelele wiifundja kungoloneya gwoshitopolwa pethimbo kwa tseyithwa olopota yopapangelo yoshitopolwa shoka.
Momasiku 24 gaAguste, Okakomisi kAaniilonga yEpangelo oka shangele Amutse ombaapila ka hala opo a shunithwe miilonga aanambelewa mboka, okwa ningwa oonkundathana naAmutse nokakomisi oka zimine ekutho lyawo miilonga.
ILENI NANDJATO