A tulwa miipandeko omolwa edhipago lya kuume ke

A tulwa miipandeko omolwa edhipago lya kuume keKuume ke a yakapo woo oshiyenditho she Aakalimo yomondoolopa yaSwakop oya haluthwa noonkondo konkundana yedhipago lyaThomas Frederick (Frikkie) van Schalkwyk (69), ngoka a pondwa sigo omeso kukuume ke omunamimvo 36. LEANDREA LOUW







Oshiningwanima shoka osha ningilwa megumbo lyanakusa moSwakopo oshiwike sha piti.

Omunambelewa omukwatakanithi omukonaakoni gwiimbuluma moshitopolwa shErongo, omupeha komufala, Erastus Iikuyu, okwa koleke kutya Van Schalkwyk, omunangeshefa okwa pondelwa megumbo lye mepandaanda lyaCamelthorn mOcean View lwopotundi onti 21:00 Etine lya piti.

“Nakusa nakuume ke ngoka omufekelwa moshipotha oyali megumbo lyaVan Schalkwyk sho oontamanana dha tukuka pokati kawo. Omufekelwa okwa pondo Van Schalkwyk opo a kanithe oonkondo ihe okwa si,” Iikuyu a popi.

“Omufekelwa okwa pata egumbo na okwa hingipo ohauto yanakusa yoJeep nokuya kegumbo lyomulandithi gwiingangamithi moNarraville mOmbaye hoka a pingakanitha ohauto ndjoka niingangamithi.”

Pahapu dhaIikuyu, omufekelwa okwiifala kopolisi lyopotundi onti 15:00 mEtitano, na okuli mondjeedhililo.

Van Schalkwyk okwa kala hazi megumbo lye oye ayeke nomufekelwa opo e ya mo a zilie kOtjiwarongo na okwe ya okukonga iilonga moSwakopo. Okwa kala ha zi naVan Schalkwyk.

"Olutu lwanakusa olwa adhika mondunda yokuuhala na olwa falwa koshipangelo shepangelo moSwakopo. Ohauto ye yoJeep oya falwa kosasiyona yopolisi hoka ya tulwa megameno,” Iikuyu a popi.

Aapambele yanakusa oya tseyithilwa eso lye nomutamanekwa okwali tegelelwa a holoke mOmpangulilo yaMangestrata gwaSwakopo ohela ta tamanekelwa oshipotha shedhipago nuulunga woshihauto. Edhina lye kalya li lya tumbulwa omanga ina holoka mompangu.

leandrea@republikein.com.na