Aanona yoontauki ya thiminikwa okuza mooskola

Aanona yoontauki ya thiminikwa okuza mooskola Aanona yoontauki dhoka dhili moshilongo shaaheli pampango, oya zi mooskola opo ya vule okufalwa koAngola pamwe naavali yawo.

Aanambelewa yomatembu mOpuwo mOshitopolwa shaKunene, mEtitatu oya thindikile oontauki dha thika po-200, dhaaTjizemba koAngola.

Aalumentu ya thika po-130 oya falwa nosheendo shotango omanga aakiintu 80 naanona ya tegelele olweendo olutiyali.

Ongundu ndjoka oya kwatela mo aanona yoskola mboka ya kala taya sikola moNamibia.

Aavali yamwe oya popi kutya otaya thigi po aanona yawo mboka yeli momihandjo dhooskola.

“Onda kala moNamibia uule woomvula ndatu. Ondi na uunona uwali hawu yi koskola wuli momuhandjo, oshowo haka handi kala nako pegumbo,”Hondjorokeni Kazu ta ti.

“Nguka ohayi poskola yaOmbombo Primary School mondondo ontiyali, na onda thiminikwa opo ndi mu kuthe moskola opo tu vule okuya naye. Mbeyaka yaali otandi ya thigi po molwaashoka inandi pewa ethimbo lya gwana opo ndike ya taleko koskola ndjoka yi li kokule.”

Oontauki dhimwe odha popi kutya odhe ya moNamibia okukonga uuhupilo,nokuninga ongeshefa nenge okukonga omakwatho gopaunamiti.

“Otwa adhika momapandaanda nayakwetu tatu landitha. Otu na omikanda ihe aniwa omikanda dhetu kadhi na ongushu,” Ilena Mbatutu ta ti.

Okutameka omasiku ga 7 gaKotomba, aanambelewa yomatembu mekwathelo lyOpolisi, oya tameke okukongamo oontauki moondoolopa ngaashi Khorixas, Kamanjab nOpuwo. Aantu omathele oya adhika kaye na omikanda dhokukala moNamibia.

Omupeha Komufala gwOpolisi moKunene, Jaron Iita, okwa lombwele oNamibian Sun kutya Uuministeli wOmaatembu owo wa tamekitha oshikonga shoka, nopolisi oya gandja owala eyambidhidho.

Ompangu yomatembu oya gandja etokolo opo oontauki dhoka dha kwatwa dhi shunwe koshilongo shawo. Aaanambelewa yomatembu oya tindi okutya sha kombinga yokundana ndjika, noonkambadhala okumona omayamukulo okuza komupopiloko gwUuministeli wOmatembu, Salome Kambala, odha ndopa.

ILENI NANDJATO