Ompango yoonakulwa oyi li pakotampango Ompango ndjoka oya nuninwa owala mboka ya kondjele emanguluko lyaNamibia Aakwiita-nale yoSWATF/Koevoet oya dhengwa pomutima, sho Ombelelwa yOmbudsman ya tseyitha kutya Ompango yoonakulwa Aakulu yomomvula yo-2008, otayi endele pamwe nEkotampango lyaNamibia. Aakwiita nale mboka taya kwatelwa komeho koNamibia War Veterans Trust (NAMVET) oya ka konga omayele kombinga ngele ompango ndjoka otayi tsu kumwe tuu nekotamango lyoshilongo.Oya hala okuuva ngele sho inaya kwatelwa mo mompango ndjoka molwaashoka oya li taya longele oSouth African Defence Force (SADF), SWATF nenge Koevoet, oshi li tuu pakotampango na itashi yi pondje ekotampango lyoshilongo. Oonakulwa mboka oya popi kutya ompango ndjoka otayi tongola molwaashoka inayi kwatelamo aakwaita mboka ya li taya longele epangelo lyokatongotongo.
Mboka oye wete kutya, nkene oshilongo sha manguluka oya kala taya ihumbatelwa nayi nokutongolwa na oya kanitha ongushu yawo yopauntu niiyemo. Ontopolwa onti-10 yekotamango lyoshilongo, oya tothamo kutya aantu ayehe oye thike pamwe komeho goveta , na kape na ngoka a pumbwa oku tongolwa.
Pamaiyuvo ge, Ramon Maasdorp gwOmbudsman okwa popi kutya Ompango yOonakulwa Aakulu oya yooloka kutya oya nunimwa mboka ya kondjele emanguluko lyoshilongo ihe hayo mboka ya kondjo yeli ompinge nemanguluko lyoshilongo.
“Elalakano lyompango ndjoka okugandja omakwatho gopaiyemo kwaamboka ya tula moshiponga oomwenyo dhawo mekondjelomanguluko lyaNamibia, okuza kepangelo lyokatongotongo lyaSouth Afrika,” Maasdorp ta ti.
Okwa popi kutya ompango ndjoka itayi tongola nonando kutya olye, na okwa popi kutya iilyo nale yoSWATF/Koevoet ina yi tongolwa kompango ndjoka ihe kayi li oshitopolwa shompango ndjoka ya nuninwa aakondjelimanguluko lyaNamibia.
Nonando ongaaka omunashipundi gwoNamvet, Jabulani Ndeunyema okwa popi kutya omahololomadhilaadhilo ngoka taga ningwa kaakwiita nale mboka otaga tsikile.
CATHERINE SASMAN