Etosha tali kutha aaniilonga miilonga Ehangano lyEtosha Fishing Corporation olya tseyitha kutya otali ka kutha miilonga aaniilonga 21 yomaaniilonga 65.Omunambelewa Omukomeho gwIilonga mehangano ndyoka, Pieter Greeff okwa popi kutya oya ningi etokolo ndyoka onga omukalo gwokushunitha pevi iifuta yehangano sho lya taalela onkalo ya nayipala.
Greeff okwa popi kutya omwaalu omushona gwoohi dhoka dha kwatwa mo-2015 no-2016 ogwo tagu thiminike ehangano li kuthe miilonga aaniilonga oshowo eyo pevi lyongushu yiimaliwa yaNamibia komapindiko giimaliwa.
Ehangano olya popi kutya olya ya momalweendo iikando yontumba nuumvo ihe inali kwata sha.
Olya popi kutya kakele koomwaalu gwoohi dhili pevi, ehangano olya gandja woo uusama konkalo yombepo ya nayipala kutya nayo otayi etitha uupyakadhi.
Omunambelewa ngoka okwa popi kutya ehangano olya landula omilandu nokuya moonkundathana nUuministeli wAaniilonga oshowo ehangano lyoNamibia Seamen and Allied Workers Union (NASAWU.
Onga omukalo gwokukaleka po iilonga ehangano ndyoka okuza mo-2010 olya kala noku eta oohi moshilongo, nonuumvo olya e ta mo ootona 6 400, ihe omolwa ongushu yiimaliwa tayi gu pevi, oohi dhoka dha etwa moshilongo inadhi vula okweetitha iiyemo ya sha.
Ehangano ndyoka tali adhika mOmbaye olya totwa po moomvula dho1940, na olya kala tali dhana onkandangala moshikondo shoohi moNamibia.
OTIS FINCK
caption
TAYA ZI MIILONGA: Ehangano lyokukwata oohi lyEtosha olya tseyitha ekutho miilonga lyaaniilonga yamwepo.
ETHANO: TWELI TUMINWA