Hidipo Hamutenya a hulithaAaNamibia mwa kwatelwa aaleli yoongundu dhopolotika dha yooloka oya holola oluhodhi lwawo omolwa eso lyagumwe gwomomapendafule goshilongo. Hamutenya okwa hulitha konima yuuwehame wethimbo ele Hidipo Hamutenya okwa hokololwa koyendji kutya ependafule na okuli gumwe gwomaakondjelimanguluko yoshilongo. Hamutenya okwa hulitha ongula yEtine, moshipangelo shaVenduka, mepupi lyoomvua 77.Gumwe gwoomaalilisa Omupresidende Hage Geingob, ngoka a talelepo ofamili yanakusa konima owala yethimbo efupi sho a thiki moshilongo okuza koSouth Afrika, hoka a li niilonga.
“Ofamili oya kanitha he yawo. Ngame onda kanitha kuume kandje nomulumentu ngoka nda koko pamwe naye. Namibia okwa kanitha limwe lyomomapendafule ge. Ondiinekela kutya ngashiingeyi ota vululukwa molwaashoka okwa mono iihuna nale,” Geingob a lombwele oNBC, pegumbo lyaHamutenya.
“Okwa li omulumentu e na uunongo, omunambili nomwiifupipiki. Okwa li omuntu gwaantu, nondjodhi ye okukala nonkalamwenyo ombwaanawa nokumona oshilongo she sha manguluka. Ondi na etumba okukala omonamati nokumona ompito yokukala nomulumentu nguka omwaanawa,” Lineekela ta ti.
Omuleli gwOngundu yoDTA, McHenry Venaani okwa tongomona Hamutenya kutya okwa yambidhidha oshindji kemanguluko lyoshilongo. Okwa popi kutya Hamutenya okwa li ependafule enene naashoka a ningile oshilongo shika itashi dhimbiwa.
“Okuza kiilonga mbyoka a longo pethimbolyekondjelomanguluko, sho a yi koZambia nokiilongo yilwe, oshowo ekuthombinga lye meindilo lyemanguluko lyaNamibia ndyoka lya ningwa kIigwana yaHangana oshowo okukala gumwe gwomiilyo yoPaliamende yOshilongo mbyoka ya totopo ekotampango lyoshilongo. Onduuvite owala nayi kutya oshilonga shoka a longo inashi simanekwa omanga e li momwenyo. Natu kutheni oshiholelwa huka e ta tu simaneke omapenda getu omanga ge li momwenyo,” Venaani ta ti.
Nangolo Mbumba gwoSwapo, okwa popi kutya egalukilo koSwapo lyaHamutenya omvula ya piti, olya li enyanyu enene mongundu tayi pangele.
“Okwa li enyakwa ndyoka lya longitha uunyasha walyo mokukondjela emanguluko lyoshilongo. Kehe shoka a ningi okwe shi ninga onga ependafule lyoshilongo,” Mbumba ta ti..
Omupresidende gwoRDP, Jeremiah Nambinga okwa pula epangelo opo li gandje efumbiko lyopapangelo kuHamutenya.
Nambinga okwa popi kutya eso lyaHamutenya oli li ekanitho enene kOngundu yoRDP.
“Okwe tu kwathele metotepo lyoRDP, na otwa li twa longitha egumbo lye onga oombonge oonene dhongundu, otatu mu pandula,” Nambinga ta ti.
Ondjokonona ye
Hamutenya ngoka a li nale ominista yIipindi, Ominista yOmauyelele oshowo Ominista yIikwapondje, okwa yi mekondjelomanguluko pondje yoshilongo moomvua 1960. Hamutenya okwa sikola pamwe naGeingob moUSA oshowo Omupopi nale mEgumbo lyoPashigwana, Theo-Ben Gurirab.
Mboka yatatu pamwe nayakwawo yalwe oya kalelepo Swapo moAmerika mwakwatelwa ekwatelo komeho lyeyambidhidho lyongundu oshowo Namibia opo a vule okumona emanguluko lye.
Nakusa oku na uulongelwe wuutoolinkundana, oshowo elongo lyopapolotika, mwakwatelwa oMaster of Arts degree. Hamutenya konima okwa ningi amushanga gwelongo gwoSwapo na okwali omupevi omukomeho gwoUN Institute for Namibia moLusaka moomvula dho-1970.
Kwiikwatelelwa koGuide to Namibian Politics, HH, ngaashi a tseyika nawa okwa mono epapa lyo’African Personality of the Year’ okuza koshikundaneki shaLondon shedhina fDi omolwa oonkambadhala dhe dhokweeta omapungulo gopondje yoshilongo moNamibia, ihe oshinakugwanithwa she shIikwapondje osha thiki pehulilo mo-2004 sho Omuleli nale Sam Nujoma e mu kutha miilonga ku na owala omasiku gane opo ku ningwe omutumba omunene gwomahogololo gookandindate dhomahogololo guupresidende moSwapo.
Pomahogololo ngoka Omupresidende nale Hifikepunye Pohamba, ngoka a li omuhogololwa gwaNujoma okwa sindana po uukandindate mboka, a landulwa kuHamutenya oshowo Nahas Angula.
Lwanima Hamutenya okwa thigipo oSwapo, na okwa ka totapo ongundu ye yoRally for Democracy and Progress (RDP) mo- 2007, ndjoka ya ningi ongundu yompilameno yopambelewa sha landula omahogololo ngoka ga ningwa mo-2009. Ongundu ndjoka inayi shi pondola momahogololo go-2014, shoHamutenya a dhengwa mo momahogololo kuGeingob.
Ongunduyo DTA, oya kutha po ehala lyongudu yompilameno yopambelewa konima yomahogololo. MuAguste gwomvula ya piti, Hamutenya okwa haalutha oyendji sho a shuna kongundu yoSwapo. Nakusa okwa thigako omukulukadhi gweNangula, oshowo oyana yatano. Omalongekidho gefumbiko otaga ningwa.
JEMIMA BEUKES
caption
EPENDA: Hidipo Hamutenya pamwe nependafule
John Ya Otto Nankudhu poshigongi shoSwapo mo-1989.
ETHANO: JOHN LIEBENBERG