Taya hupu momapandaanda Ongundu yaanona aashona otayi adhika mulimwe lyomomahala gaakengeli mOvenduka, moka aanona mboka ya popi kutya otaya hupu mokweehela aantu .Konyala aanona mboka yeli o-12 oya popi kutya oye ya mehala ndyoka opo ya kale taya ehela aantu iimaliwa na ohaya longitha iimaliwa mbyoka mokulanda iikulya yawo.
Oyendji yomaanona mboka oya popi kutya oya hala okukala monkalo ndjoka shi vulithe okukala momagumbo gawo hoka ya zi ontuku yomamonitho giihuna oshowo okwaahasilwa oshisho kaakwanezimo yawo.
“Katu na aahona, ohatu isile oshisho tseyene,” gumwe gwomuunona mboka, ngoka a pula opo edhina lye kali popiwe, a popi. Oyendji yomaanona mboka aanona yaamati yoomvula dhili pokati ka 8 no 16 oshowo aakadhona yaali. Oya popi kutya oyendji oya kala pehala ndyoka uule woomwedhi ndatu.
Aanona mboka oya pula opo ehala ndyoka yeli kali popiwe nonando ehala ndyoka ye li olya kala nokutalika omeho komalelo omolwa omanyenyeto ngoka ga zi moshigwana.
Metitano, opolisi yoshilando oya ithanwa konima sho aanona mboka ya adhika taya ehela iimaliwa pomatsakanena goondjila. Omathano ngoka ga monika oga ulike kutya aanona mboka mwa kwatelwa aakadhona yaali inaya zala omizalo dhiihwapo.
Okamwayinamati kokakadhona kamwe oka popi kutya oka hala okushuna koGobabis kegumbo, hoka oyendji yomaanona mboka oko ya zile ihe mumwayinakadhona ina hala okushuna.
Pehala mpoka otapu monika okatalashe okashona naanona mboka oya ulike nkene haya ithinaneke pokatalashe hoka opo ya lale.
Oyendji yomaanona mboka ya popiwa nayo oshiwike sha piti koNamibian Sun ina hala okupopya kutya oshike sheya thiminike opo ya thigepo omagumbo gawo, nokukala monkalamwenyo ndjoka yoku ehela.
Kamwe komuumati mboka hoka ka popi kutya oke na oomvua 14 nonando otaka monika okashona, oka popi kutya oka kala nokumonithwa iihuna kuhe, uuna a longitha iikolitha, na otaka monika ke na iiyadhi moshipala.
Okamati kamwe oka popi kutya oka thiminikwa kaye momapandaanda konima sho yina a hokanwa po komusamane gumwe. Okwa popi kutyaokwa kala nayinagona ihe ina hala okukala naye molwaashoka megumbo omu na ondjala.
JANA-MARI SMITH