KK a popi kombinga yoonkundathana dhomadhipago gaaNamibia kuNdowishiOshilyo nale shOmutumba gwEgumbo lyoPashigwana, Kazenambo Kazenambo okwa popi kutya oonkundathana kombinga yomadhipago ga kiinahenda ngoka ga ningilwa AaNamibia, kuNdowishi, nadhi kalekwe manga opo ku kongwe omukalo omupe gwokukwatela komeho oonkundathana dhoka. AaNama nAaHerero naya ninge oshitopolwa shoonkundathana Kazenambo okwa popi kutya omukalo ngoka tagu longithwa monena kagu na mpoka tagu fala oonkundathana dhoka, na ogwa patela pondje oonakuninga iihakanwa yomadhipago ngoka ga ningwa pokati ko1904-1908.Okwa popi kutya AaNama oshowo AaHerero itaya vulu okukalelwa po moonkundathana dhoka, omanga ekotampango lyoshilongo tali utha uuthemba waakwashigwana ayehe.
Okwa popi kutya oonakuninga iihakanwa kaye na owala uuthemba wokukala moonkundathana dhoka ihe oye na woo uuthemba wokumona evi lyawo ndyoka ya kuthwa pethimbo lyuukoloni.
Kazenambo okwa pandula epangelo lyaNamibia sho lya shuna mopaliamende oonkundathana dhoka nokutula miilonga okomitiye ndjoka tayi ningi omitumba dhaakwashigwana kombinga yaakwashigwana mboka ya gumwa komadhipago ngoka.
Omauyelele ngoka taga monika otaga ka tumwa kepangelo lyaNdowishi. Okwa pula opo aakwashigwana yomihoko dha gumwa ya kuthe ombinga moonkundathana na itaya kalelwa po owala kepangelo. Uuministeli wOmakwatathano goPaigwana owa popi kutya aakwashigwana yamwe po oya tindi okulongela kumwe nepangelo mokukandula po omukundu ngoka. Kazenambo okwa tindi olopota ndjoka kutya kayi na uukwashili.
Kazenambo okwa dhenge omuthindo kutya oonakuninga iihakanwa oya pumbwa okukutha ombinga nokukala oshitopolwa shoonkundathana dhoka. Kazenambo okwa tsikile kutya omatumwalaka ga yooloka otaga zi kombinga yepangelo moshikumungu shoka. Omupeha Presidende gwoshilongo Nickey Iyambo okwa popi kutya oonkundathana odhili pokutameka naakalelipo yepangelo lyaNamibia okwa tegelelwa ya ye koGermany opo ya ka kuthe ombinga moonkundathana.
Shoka osha landula omapopyo gomukalelipo gwaNamibia, Dr Zed Ngavirue, ngoka a popi kutya epangelo lyaNamibia olya gandja nale ondokumende ndjoka tayi kwatele komeho oonkundathana dhoka komeho. Ngavirue inaya muule wondokumende ndjoka ihe okwa popi kutya okwa pumbwa oku yi gandja komupresidende Hage Geingob.
Kazenambo okwa pula kutya olye ta kwatele komeho oonkundathana dhoka, ngele oDr Iyambo nenge oDR Ngavirue, nenge pamwe aanambelewa yaashiwike okuza muuministeli.