Swapo ita yamukula omapulo goFishrot

Swapo ita yamukula omapulo goFishrot Ongundu tayi pangele onkene tayi tsikile nokumwena kombinga yoshikumungu shoFishrot, nonando oyendji yomaaleli yongundu otaku fofodholwa kutya oyeli ya mono iimaliwa okupitila mekengelelo ndyoka. JEMIMA BEUKES

OVENDUKA



Nonando aaleli oyendji mongundu yoSwapo otaku fekelwa kutya oyeli oonakumona iimaliwa okuza moFishrot, Swapo onkene ta henuka okuyamukula omapulo ge na sha noFishorot, nokuholama konima kutya oshikumungu shoka oshi li mompangu. Omupopiliko gwongundu ndjoka Hilma Nicanor okwa popi mOsoondaha kutya ina pewa oonkondo dhokupopya iinima yoludhi ndoka.

Omunambelewa omukuluntu gwoFishcor, ngoka ngashiingeyi a kuthwa miilonga, Mike Nghipunya, okwa gandja uumbangi kutya okwa shaina egandjo lyiimaliwa kongundu yoSwapo okuza mehangano ndyoka, sha landula ezimino lya gandjwa kominista nale Bernhardt Esau, ngoka naye e li mondjeedhililo omolwa oshikumungu shoka.

Inaku yelithwa kutya iifuta mbyoka oya shike, kakele kokuholola kutya oya nuninwa omalalakano gepangelo. Swapo onkene kwa tegelelwa a yelithe iifuta mbyoka oshowo yilwe.

Oshiwike sha piti, oshifokundaneki shoThe Namibian osha lopota kutya aaleli yoSwapo oyendji taya kwatakanithwa nelyenge ndyoka, ngaashi mboka yEwawa lyAanyasha oshowo ongundu yoondjimbo yoNdilimani.

Omupesidende Hage Geingob okwa tindi okupopya kombinga yoshinima shoka, pethimbo a li ta gandja oshipopiwa she shopashigwana omasiku ga piti. Swapo okwa kutha Esau oshowo Sacky Shanghala momusholondondo gwiilyo yawo moPaliamende, inaya tegelele oshipotha shoka shimanithwe mompangu.

“Ngele ongundu otayi popi kutya oshigwana nashi tegelele oshipotha shoka shi manithwe mompangu omolwashika ya kutha moEsau naShanghala moPaliamende omanga oshipotha inashi pwa. Omaipopilo gawo otaga etitha owala omalimbililo ogendji,” oshilyo shimwe shongundu dha holola.

Nicanor okwa popi kutya iikundaneki yimwe otayi kambadhala okunyateka ethano lyongundu oshowo lyaGeingob.

“Oshilongo shika oshi na iiputudhilo mbyoka tayi vulu okuungaunga oshikumungu shoka tamu popi. Ngele owu na uuyelele kombinga yoshikumungu shoka ihe kayi shi iilombo kombinga yiifuta mbyoka nena inda kiiputudhilo mbyoka.”

Omolwashike tu na okuulwa kutya aakengeleli uuna tatu popi oshili?” Nicanor a pula.

Omunongononi gwopolotika Graham Hopwood okwa popi kutya Swapo otashi vulika a kale ta popi ngaaka ihe kape na shoka tashi ningwa sigo oshipotha shoka sha manithwa mompangu, nonando otashi ka kutha oomvula.2

Okwa holola kutya ngashiingeyi edhina lyaSwapo olya nyata, na okwa pumbwa okuninga oshinima shomondjila nokuliyelika.

Okwa tsikile kutya ke wete pe na shoka tashi vulu okwiimba Swapo a ninge omakonaaakono gomeni, nuumbangi kehe ta mono tawu gandjwa koACC.



Elando lyomawi

Iimaliwa yoFishrot ya pewa Swapo otaku popiwa kutya oya longithwa pethimbo lyomutumba gwomahogololo gaaleli yongundu momvula yo 2017, omanga yamwe taya popi kutya iimaliwa oya longithwa okulanda omawi gaakuthimbinga.

Oondokumende dha pitithwa oshiwike sha piti amushanga gwaanyasha moSwapo, Efraim Nekongo oshowo omulanduli gweVeikko Nekundi mwakwatelwa olutu lwaailongi lwoNamibia National Students Organisation (Nanso) oya mono iifuta okupitila mehangano lyoohahende lyoDe Klerk, Horn & Coetzee Incorporated.

Ehangano ndyoka otaku popiwa kutya olya longithwa onga elila lyiimaliwa yuumbudhi ya thika poomiliyona dhi vulithe po75.

Omupresidende gwoNanso, Simon Taapopi okwa tseyitha kutya oya tamekitha omakonaakono ge na sha nomapopyo ngoka ihe shoka ya mono po osha holola kutya ehangano lyawo inali mona iimaliwa mbyoka.

“Omayalulo getu gombaanga gopokati ko 31 gaKotomba 2017 no 31 gaDesemba 2017 otaya vulu okumonika nokutalwa nawa, ngele oga pumbiwa.”

Nicanor okwa gwedha po kutya ongundu yawo oyiitulamo mokukwashilipaleka esindano pethimbo lyomahogololo ngoka taga ningwa nuumvo. Ongundu otayi ka lundulula woo Ekotampango lyawo, opo kwiindilwe iilyo yi kuthe ombinga momagohololo onga aahogololwa yiithikamena.

jemima@namibiansun.com