Ondangwa tayi landitha po oplota dhoka inadhi pwa okufutwa Konyala aantu ya thkia po150 mboka ya li ya ningi omaindilo gooplota dhomagumbo mOndangwa okwa tegelelwa ya ka kanithe ooplota dhawo olwaashoka inaya futa.Mboka taya ka gumwa konkalo ndjoka oomboka ya pewa ooplota ihe otaya nyengwa okudhi futa.
Momusholondondo gwaamboka omwa kwatelwa aanangeshefa oshowo aanapolotika.
Elelo lyondoolopa yaNdangwa olya gandja ooplota dha thika po-200 pokati komvula 2001 no 2015 nooplota dhoka otadhi ka pewa mboka yeli momusholondondo gwokutegelela okumona ooplota, pahapu dhomunambelewa omukuluntu gwelelo lyondoolopa yaNdangwa , Ismael Namgongo.
Okwa popi kutya mboka yali ya pewa evi oya tseyithilwa pamushangwa kutya oye na oomwedhi hamano ya fute omavi gawo.
Elelo lyondoolopa olya popi kutya olya tokola okulanditha po omavi gaamboka taya nyengwa okuga futa opo ya kandulepo ompumbwe yomagumbo mondoolopa.
“Elelo lyondoolopa otali longitha iimaliwa oyindji okulonga nokuwapaleka evi ndyoka ihe mboka ye li pewa otaya ndopa okulifuta, otatu indile aantu ya ninge omaindilo gevi uuna ya pyakudhukwa,” Namgongo ta ti.
Mboka ya futako komavi gawo otaya ka shunithilwa iimaliwa yawo.
Namgongo ina vula okugandja ongushu yomavi ngoka ihe okwa popi kutya oyoomiliyona odhindji.
ILENI NANDJATO