Elongo lyaakuluntu otali ku mangulula Petrus Hanghome okwa hokolola nkene onkalamwenyo ye yalundulukaa konima sho a yi kootundi dhelongo lyaakuluntu mo-1993 nomonena ota vulu okuya momakwatathano nakehe gumwe. Hanghome okwa li ta popi pethimbo lyedhimbuluko lyEsiku lyoLitercy mOshitopolwa shaShana, ndyoka lya ningilwa poshinyanga shiigongi shUukwangula.Oshituthi shoka osha ningwa kohi yoshipalanyolo ‘Promotion of Information Communication Technology in delivering literacy and lifelong learning for sustainable development’
Okwa popi kutya mo-1993 okwa li ta kathele yina mokutembudha egumbo lyawo momukunda Ohakweenyanga sho uuvu moradio opo aakuluntu mboka kaye shi okulesha nokushanga ya kiinyolithe yo ya tameke ootundi sholiteracy.
Hanghome okwa hokolola kutya konima yesiku limwe sho uuvu etseyitho ndyoka okwa tokola okuya kOshakati Primary School hoka oko a kiishangitha.
“Ngame ondili oshiholelwa shepondolo lyelongo lyaakuuluntu. Ngele owa mono tandi ende tandi lesha nokupopya oshiingilisa osha tamekela melongo lyaakuuluntu,” Hanghome ta ti.
Hanghome okwa tsu omukumo aakuluntu yakwawo mboka kaye shi okulesha nokushanga opo ya tameke ootundi dhelongo lyaakuluntu molwaashoka otashi ya kwathele uuna taya kongo woo omakwatho miiputudhilo ya yooloka.
Omukomeho gwElongo mOshana, Hileni Amukana okwa popi kutya elongo ndyoka nali tale komukalo gokwiilonga tagu tala pomahala agehe. Amukana okwa popi kutya Oshana oshi na aailongi aakuluntu ya thika po-550 mboka yiishangitha noNational Literacy Programme in Namibia (NLPN) mo 2016 moka 122 alumentu omanga aakiintu ye li 428.
Amukana okwa popi kutya omahwahwameko guutekinologi melongo lyaakuluntu otashi gandja uunongo koohandimwe nkene ye na okuuva onkalo yuuyuni nokukutha ombinga mukehe shoka tashi ningwa nokuholola woo omawi gawo.
Kombinga yomikundu ngoka gwa taalela ootundi dhoka, Amukana okwa popi kutya aakuluntu yamwe ihaya kuthako ootundi dhawo nomukumo naalumentu oyendji ihaya hiti ootundi dhoka. Okwa popi kutya aahwahwameki yootundi dhoka nayo otaya thigi po iilonga okuka ya kiilonga yi li hwepo.
KENYA KAMBOWE